Осылайша, Қора көшесінде әлеуметтік осал топтағы азаматтарға 40 пәтерлі тұрғын үй пайдалануға берілді. Былтыр ғана құрылысы басталған көпқабатты үй заман талабына сай жабдықталған. Жалпы алаңы 3,4 мың шаршы метрді құрайды. Оған жауапты мердігер – «СЕМ Шоғы құрылыс» ЖШС. Құны 780,6 млн теңгені құрайтын баспананы алдымен үй кезегінде тұрған толық емес және көпбалалы отбасылар, жетім балалар, зейнеткерлер, мүмкіндігі шектеулі азаматтар, бюджеттік мекеме қызметкерлері алды.
«Қаладағы тұрғын үймен қамтамасыз ету мәселесіне тоқталатын болсам, кезекте тұрғандардың саны жылдан-жылға өзгеріп тұрады. 2022 жылы кезекте 964 адам болса, 2023 жылы – 1 092 адам, биыл 1 023 адам болды. 2022 жылы тұрғын үй берілмеді, 2023 жылы 192 пәтер берілді, оның ішінде 59 пәтер сатып алынды. Тұрғын үй кезегіндегі 1 023 азаматтың 449-і – әлеуметтік осал топтағылар, 122-сі – жетім балалар, 150-і – көпбалалы отбасылар, 302-сі бюджеттік сала қызметкерлері саналады. Қала бойынша барлық қаржыландыру көздері есебінен 10,8 мың шаршы метр тұрғын үй қолданысқа беріледі. Оның ішінде 6,8 мың шаршы метрі – бюджет есебінен», дейді қала әкімі Алмас Әділ.
Жаңа тұрғын үйде 15 бір бөлмелі, 5 екі бөлмелі, 15 үш бөлмелі және 5 төрт бөлмелі пәтер бар. Аула аумағы абаттандырылған. Балалардың ойын және спорт алаңдары бар. Тағы бір атап өтерлігі, көпбалалы отбасылардың сұранысына сай тұрғын үй жобасына төрт бөлмелі 5 пәтер арнайы енгізілді. Үйдің балкондарын мердігер компания өз қаражаты есебінен жауып берді. Осы ретте баспана қуанышына бөленгендер арасында қала тұрғыны Қанипа Осанова әсерімен бөлісті.
«Баспаналы болу – әр азаматтың арманы. Біз де осы сәтті көптен күттік. Менің балам – ІІ топтағы мүгедек. Бүгін, міне, екі бөлмелі жаңа пәтерге ие болып жатырмыз. Бұл – отбасымыз үшін үлкен қуаныш. Осындай мерейлі сәттеріміз көп болсын. Бізге үй сыйлаған облыс әкімдігіне, осындағы азаматтарға алғысымды айтамын», деді Қ.Осанова.
Бұған қоса халықтың әлеуметтік осал топтарын тұрғын үйлермен қамтамасыз ету мақсатында 50 тұрғын үйді сатып алуға 962,8 млн теңге қаражат бөлінген. Текелі қаласы әкімдігі, «Elite strоy ED» ЖШС және «Temir stroy Alatau» ЖШС арасында жеке тұрғын үйлердің құрылысы бойынша меморандумға қол қойылып, 50 жеке тұрғын үй салу көзделген. Аталған тұрғын үйлердің құрылысы 2024 жылдың соңына дейін аяқталып, пайдалануға беріледі. Сонымен қатар Ғарышкерлер көшесінде 40 пәтерлі несиелік тұрғын үйдің және оның инженерлік-коммуникациялық желілерінің құрылысы жүргізіліп жатыр.
Жалпы, Жетісуда 8 аудан мен 2 қала бойынша қолданысқа берілетін тұрғын үйлердің жол картасы дайындалды. Аталған картаның шеңберінде биыл 349,3 мың шаршы метр тұрғын үйді пайдалануға беру жоспарланған. Соның ішінде осы жылдың қаңтар-маусым айларында 115,5 мың шаршы метр қолданысқа берілген. Бұл өткен жылдың сәйкес кезеңімен салыстырғанда 11,3 пайызға артық. Жыл соңына дейін қалған баспаналардың құрылысы аяқталуы тиіс.
«Бүгінде Текеліде 40 пәтерлі және 60 пәтерлі тағы екі көпқабатты үй бой көтеріп келеді. Бұған қосымша 60 отбасыға арналған 30 жеке тұрғын үйдің құрылысы жүріп жатыр. Тағы бір 60 пәтерлі бір үйдің жобалық-сметалық құжаттамасы дайындалады», дейді А.Әділ.
Қазір моноқалада туризмге бағытталған құрылыс нысандары қарқынды жүріп тұр. Сондықтан жергілікті атымтай жомарт азаматтар жерлестеріне үй сатып алып беріп, мемлекетке қолдау көрсетіп жатыр. Осыған дейін ондаған отбасының баспаналы болуына септескен кәсіпкерлердің ерлігі мақтауға тұрарлық.
Жетісу облысы
