Менің мемлекетім

Түнгі сағат бірдің о жақ, бұ жағы. Нөмір материалдарын дайын­даумен алашапқын болып жатсақ, телефон шырылдайды. Алматыдан. Белгілі ақынымыз Шөмішбай Сариев. «Өлең туды, өлең туды», дейді асыға сөйлеп. «Қандай өлең?». «Қандай өлең болушы еді, жаңа ғана естіген жақсы жаңалыққа жазылған өлең. Дүйсенбіге газет шығатынын естідім, осы өлеңімді нөмірге салып жіберіңіздерші». «Көрейік, тез жібере қойыңыз электронды поштамен», дейміз. «Ойбай, ондай өнер жоқ қой бізде, қыздарыңыз телефонмен жазып ала қойсыншы», дейді. Амал жоқ, өлең телефонмен жазылып алынды. Елдіктің жеңісіне қуанған ақын жүректің лүпілін жеткізген  ақжолтай жырды «Егемен Қазақстан» оқырмандарының назарына ұсынып отырмыз. Халқы қалап Қазақстан Президенті болып қайта сайланған Елбасымыз Нұрсұлтан Әбішұлы НАЗАРБАЕВҚА! Ақордадан бастап шекараға дейін, Аспан-жерді жалғаған екі араға дейін, Бұлт асқан ақиық тауларыма дейін, Кең көсілген даламның аумағына дейін, Менің мемлекетім!   Етегінен тауымның шыңдарына дейін, Жел үйірген құйынды құмдарына дейін Менің мемлекетім! Құм басқан ежелгі қорғанына дейін, Қалың тоғай сыңсыған орманына дейін Менің мемлекетім! Бір уыс топырағы, әр тасына дейін, Күңіренген үнсіз жартасына дейін Менің мемлекетім!   Нар атан түйенің ноқтасына дейін, Әрбір қазақ отбасына дейін, Менің мемлекетім! Жел ұйытқып жетер сөзім – Жер мен Күн арасына дейін, Көз ашып-жұмған әрбір қазақ баласына дейін, Менің мемлекетім!   Тәңір өзі бетін бұрғанынша, Жер шары қанша тұрғанынша, Жаса, менің мемлекетім!.. Жаса, менің Президентім! ЖАСА, МЕНІҢ ЕЛБАСЫМ! Шөмішбай САРИЕВ, ақын, Қазақстанның еңбек сіңірген қайраткері. АЛМАТЫ.