Акция аясында су қоймаларын, ауылдар мен қалалардың аумақтарын тазарту, қоқыс жинау және сұрыптау жұмыстары ғана емес, Қазақстанның тарихи, мәдени, табиғи және тарихи ескерткіштерінің жағдайына қоғам назарын аудару да көзделіп отыр.
Тарихи ескерткіштерді сақтау мәселелеріне қоғам назарын аудару және жалпы тарихымызға, мәдениетімізге, табиғатымызға жауапты көзқарас қалыптастыру мақсатында партия мүшелері мен «Жастар рухы» жастар қанатының өкілдері ұлттық мұра нысандарын қоқыстан тазартуға кірісті. Мәселен, Ақтөбе облысында партия мүшелері XIX ғасырдың 30-жылдарындағы халық көтерілісінің көшбасшысы, ұлт батыры Исатай Тайманұлы кесенесінің айналасында тазарту жұмыстарын ұйымдастырды. Ал Жамбыл облысында партия белсенділері ЮНЕСКО-ның Бүкіләлемдік мұралар тізіміне енген бірегей ескерткіш – Ақыртас қалашығын ретке келтірді. Жамбыл аудандық филиалының төрағасы Талап Әбдібеков атап өткендей, Ақыртас – бұл тек еліміздің емес, шетелден келетін туристердің де зиярат ететін орны.
«Жұмысты бастамас бұрын волонтерлер музей-қорық қызметкерлерінен қажетті нұсқаулықтан өтті. Біз аумақты жинап, археологиялық кешеннің қызметкерлеріне көмек көрсетеміз. Бұл – жас белсенділеріміз үшін туған өлке тарихын оқулықтан оқып қана қоймай, сол жерде ежелгі рухты сезіну арқылы тереңірек білуге мүмкіндік. Акция отандастарымызды ортақ құндылықтар төңірегінде біріктіретініне сенімдімін», деді ол.
Батыс Қазақстан облысының Теректі ауданында партия мүшелері «Тақсай ханшайымы» кесенесінің аумағында тазалау жұмыстарын жүргізді. Белсенділер кесене айналасын арам шөптен тазартып, шамамен 2 тонна қоқыс жинады. Мұнда 2012 жылы археологиялық жұмыстар кезінде «Тақсай қорғандар кешені» деп аталған төрт қорғаннан тұратын кешен табылған. Бұл сармат дәуіріндегі ақсүйек әйелдің бейіті – «Алтын ханшайым».
«Ескерткіш облыс тұрғындары үшін ғана емес, бүкіл республика үшін маңызды. Мұнда шамамен 1 мыңға жуық құнды тарихи артефакті табылған. Бұл жерге туристерден бөлек, оқушылар мен студенттерге ашық аспан астында экскурсиялар мен тарих сабақтары өткізіледі», деді партияның Теректі аудандық филиалының атқарушы хатшысы Мирхат Ибраев.
Қарағанды облысында партия мүшелері Шахтинск қаласының жанындағы Долинка кентінде орналасқан саяси қуғын-сүргін құрбандарын еске алу музейінде болды. «Amanat» партиясы Шахтинск қалалық филиалының төрағасы Ғалымтай Қаржасов мұндағы тарихи құндылықтарды болашақ ұрпаққа аманат ету қажеттігін атап өтті. Партия мүшелері, «Жастар рухы» белсенділері және жергілікті тұрғындардан құрылған топ музей аумағындағы ескерткіштерді жуып, қоршауларды ұсақ жөндеуден өткізді.
«Таза бейсенбі» акциясына басқа аймақтар да қатысты. Атап айтқанда, Ақмола, Атырау, Солтүстік Қазақстан, Маңғыстау облыстары және Шымкент қаласының партия мүшелері Екінші дүниежүзілік соғыс ардагерлеріне арналған ескерткіштерді тазалауға атсалысса, Қызылорда облысы Байқоңыр қаласында белсенділер «Ғылым және ғарыш» монументі айналасын ретке келтірді. Ал Алматы қаласында «Медеу» саябағындағы қоқыс жиналды. Дәл осындай игі істер басқа да елді мекендерде өтті.
«Таза бейсенбі» акциясы басталғалы бері табиғатқа және экологияға бейжай қарамайтын 45 мыңға жуық партия мүшесі мен волонтер іс-шараға белсене қатысып, еліміз бойынша шамамен 6 мың тонна қоқыс жиналды. Партия мүшелері еліміздің түкпір-түкпірінде мыңға жуық учаскені ретке келтірді, бұл – орман алқаптары, өндірістік аймақтар, жол бойындағы аумақтар, тұрғын аудандар. Сондай-ақ 100-ден астам өзен, көл, су қоймасы мен су айдынының арналары қоқыстан тазартылды.
Мұндай тазарту жұмыстарын партия мүшелері әр бейсенбі сайын жүргізеді. Бұл ретте әр учаскеге мәслихат депутаттары, белсенділер, бастауыш партия ұйымдарының басшылары бекітілген. Олар сол аумақтарда тәртіп пен тазалықты сақтауды қамтамасыз етеді, сондай-ақ қоқыс жәшіктерін орнату, аумақтарды көгалдандыру, жолдарды жөндеу сияқты инфрақұрылымды жақсарту және дамыту мәселелерін шешеді.
