«Сайлаушылар дауыс беруге ықыласпен келді»

Владимир ЗОЛОТОКОЛОВ, ТМД байқаушылар миссиясының өкілі: – Владимир Яков­ле­вич, сайлау барысын бақы­ладыңыз, не байқадыңыз? – Шынымды айтатын болсам, Қазақстандағы Пре­зидент сайлауынан көп нәр­сені байқадым дей аламын. Біріншіден, сайлауға дайын­дықтың жоғары дең­гейде жүргізілгенін бірнеше сайлау учаскесіне барғанда анық аңғардық. Екіншіден, сайлау үдерісі заң талаптарына сай өтуде. Ешбір заң бұзушылықты көргеніміз жоқ. Үшіншіден, сайлаушылардың дауыс беруге келу белсенділігінің жоғарылығы таңдан­дырды. Сайлаушылар лек-легімен сайлау учаске­леріне келіп, өз таңдауын жасау үшін ұзын-сонар кезекке тұр­ғанының өзінен олардың азаматтық бел­сенділі­гінің артқанын байқауға болады. Бұл нені біл­діреді? Шын мәнінде адамдар сайлауға әлеуметтік жағдайы жақ­са­рып, елдегі экономикалық өрлеу қарқыны үдеген кезде қуана барады. – Сайлауды өткізуде үлгі алатындай қандай жаңашылдық бар? – Әдетте, сайлауды кезекті шара дейтін пікір бар. Бірақ, дұрысында бұл саяси шара да ұдайы жа­ңар­туды, жаңашылдыққа ұмты­луды қажет етеді. Міне, осы тұрғыдан айтқанда, сайлау­ды өткізуге дайындық кезін­де көңіл аударуға тұралық бір жайтты аңғардым. Бұл –сай­лаушылар тізімінен өзін таба ал­мағандар үшін мекен-жай анық­тамасын алудың жаңа форматы. Әр учаскеден бірне­ше сайлаушының мекен-жайы анықтамасы үшін хабарласуы сайлау комис­сияларының бірқатар жұмыс­тарды атқарғанының дәлелі бола алады. – Сайлау үдерісін бақылаудан қандай әсер алдыңыз? – Мен сайлау шарасына қатысты көп жылдық тәжірибеме сүйене айтар болсам, бұрыннан сайлау күнін адамдар мереке ретінде қабылдайды. Кейде өте қат тауарлар жәрмеңкесі ұйымдастырылатынына үйреніп қалған. Дегенмен, қазір адамдар үшін табылуы қиын тауарлар жоққа тән. Іздегеніңіздің бәрі дүкендерде самсап тұр. Бірақ мұндай шараға мерекелік реңк бергеннің артықтығы жоқ. Адамдардың мерекелік көңіл-күймен жүргеніне ештеңе жетпейді. Осы тұрғыдан айтқанда, қай сайлау учаскесіне барсақ та адамдардың қабағының жадыраңқы, көтеріңкі көңілмен жүргеніне куә болдық. Бұған, әрине, көркемөнерпаздардың, әсіресе, балалардың шынайы өнері сайлаушылардың ыстық ықыласына бөленіп, оларды шаттандырды десек артық бола қоймайды. – Сайлаушылардың дауыс беру белсен­ділігі жайлы не айтасыз? – Менің бір байқағаным, сайлаушылар дауыс беруге өз ықыласымен келгені. Қазір ешкімді мәжбүрлей алмайсыз ғой. Мұны әсіресе, сайлауда дауыс беруге қатысты айтуға әбден болады. Өз елінің жарқын келешегіне қапысыз сеніп, ұдайы қарқынмен өркендеуін қалайтындар сайлауда дауыс беруге келеді. Қазақстанның патриот азаматтары елінің болашағы үшін дауыс беруде асқан белсенділік танытты деп ойлаймын. Демек, Қазақстан бұдан былайғы жылдарда да қарқынды даму ырғағынан жаңылмай, биік белестерге көтеріледі деуге толық негіз бар. Әңгімелескен Жолдасбек ШӨПЕҒҰЛ, «Егемен Қазақстан». Атырау облысы.