![Кеніштегі кездесу](/media/2024/08/16/0f481732dfb3a6243391a1feac56b820-696x435.webp)
Кездесу барысында кеніш жүргізушілерінің кәсіби қызметі мен әлеуметтік кепілдіктеріне қатысты мәселелер талқыланды. Биылдан бастап зиянды еңбек жағдайында жұмыс істеп жүрген 55 жасқа толған азаматтарға мемлекет арнаулы әлеуметтік төлем бере бастағаны белгілі. Басқосу барысында жүргізушілер өздерін осы төлем алу құқығына ие тұлғалар тізіміне қосуды сұрады.
Мәжіліс вице-спикері бұл мәселені Еңбек және халықты әлеуметтік қорғау министрлігімен бірлесе отырып талқылау қажет екенін айтты. Өйткені зиянды еңбек жағдайындағы жұмысшылардың тізімін осы министрлік бекітеді. Мәжіліс төрағасының орынбасары «ССКӨБ» АҚ жұмысшыларға әлеуметтік кепілдіктер беру және өндірістегі қауіпсіздікті қамтамасыз ету жөнінен еліміздегі жетекші кәсіпорындардың бірі екенін де атап өтті.
«Карьерлік жүк көліктерін жүргізу аса ауыр әрі жүйкеге айтарлықтай жүк түсіретін жауапты да бейнеті мол жұмыс екенін жақсы білеміз. Сіздерге лайықты еңбек жағдайын жасап, денсаулықтарыңыздың қорғалуын қамтамасыз етудің де өте маңызды екенін түсінеміз. «Amanat» партиясы сайлауалды бағдарламасында зиянды және қауіпті өндірістерде жұмыс істейтін қызметкерлердің ерте зейнетке шығуын қамтамасыз ету міндетін қойған болатын. Депутаттар заң әзірледі, Президент қолдады. Бүгінде ел көлемінде 8 мыңнан астам адам төлем алып жатыр. Ал кеніштегі жүк түсіретін көлік жүргізушілерінің зейнетке ерте шығу құқығына ие болуы жөніндегі мәселені Үкіметпен бірлесе отырып қарастырамыз», деді Альберт Рау.
Зиянды өндірістерде жұмыс істейтін қызметкерлердің зейнет жасын 55 жасқа дейін төмендету туралы заң биыл 1 қаңтардан бастап күшіне енгенін айта кеткен жөн. Заң қауіпті еңбек жағдайында жұмыс істеп келген азаматқа зейнетке шығу немесе қызмет түрін өзгертіп, жеңіл жұмысқа ауысу мүмкіндігін береді. Зейнет демалысына ерте шығу үшін немесе тиісті төлемдерді ресімдеу үшін жұмысшының кемінде 7 жыл еңбек өтілі және міндетті зейнетақы жарнасы болуы қажет.
Жиыннан соң Альберт Рау Соколов-Сарыбай кен-байыту өндірістік бірлестігіндегі автомобиль цехының жұмысымен танысып, кәсіпорынның партиялық белсенділерімен жүздесті.
Қостанай облысы