Фото: Halyq Uni
«Аудандық орталық ауруханада есепте тұрғандықтан, тегін дәрі-дәрімек алатын науқастардың саны негізсіз қысқартылған. Дәрілік заттар уақтылы жеткізілмеген. Жылыой аудандық прокуратурасының қадағалау актісі бойынша аудандық орталық ауруханада қант диабеті, артериалдық гипертензия диагноздарымен есепте тұрған 4 мың 54 адамға 19 млн 155 мың 349 теңгенің 4 866 қаптама көлемінде дәрі-дәрмектері берілді. Оның ішінде «Джардинс», «Инвокана», «Тражента», «Форсига» тағы басқа дәрілер бар. Осылайша, аудандық прокуратура тұрғындардың конституциялық құқықтарын қалпына келтірді», деп хабарлады облыстық прокуратурадан.
Ел азаматтарының конституциялық құқығының, түрлі заңдылықтың сақталуын қадағалайтын прокуратураның қызметкерлері ақжелеңділер тарапынан тағы бір заңсыздықты әшкереледі. Бұл жолы Мақат аудандық ауруханасының дәрігерлері 13 өндірістік жарақат дерегін жасырып қалғаны анықталып отыр.
«Медициналық мекеменің қызметкерлері 13 өндірістік жарақат фактісін жасырған. Аталған фактілер бойынша жұмыс берушінің кінәсінің дәрежесін анықтау үшін міндетті тексеру-тергеу қамтамасыз етілмеген. Салдарынан жәбірленушілер өздеріне тиесілі өтемақы алу құқығынан айырылды. Прокурорлық қадағалау актісі негізінде аудандық аурухана Әкімшілік құқық бұзушылық туралы кодексінің 96-бабының 1-бөлігімен (Еңбек қызметіне байланысты жазатайым оқиға фактісі туралы хабарламау) әкімшілік жауапкершілікке тартылды», деп мәлімдеді облыстық прокуратурадан.
Ал аудандағы Бейбарыс ауылдық округінің әкімі мемлекетке қомақты шығын келтіретін заңсыз әрекетке барған. Ол «Первомайский» ЖШС-ға понтонға орнатылған су насосы стансасын тендер өткізбей, сенімгерлікке беріп жіберген.
«Махамбет аудандық прокуратурасының талдауы шаруашылық субъектісі понтондық стансаны мемлекетке зиянды түрде қолдануды жалғастырып келгенін анықтады. Осыған байланысты аудан әкіміне заң бұзушылықты жою туралы ұсыныс берілді. Құны 38 миллион теңгені құрайтын насос стансасы мемлекет иелігіне қайтарылып, ауылдық округ әкімі мен есепшісі тәртіптік жауапкершілікке тартылды», деп хабарлады облыстық прокуратурадан.
Әрине, заңсыз әрекет ерте ме, кеш пе, әйтеуір, әшкере болатыны даусыз. Елдің мүддесіне нұқсан келтіріп, тұрғындардың конституциялық құқығын бұзғандар әкімшілік, не өзге жауапкершілікке тартылып жатыр. Алайда әділетті қоғам құруға қадам басқан сәтте заңсыз әрекетке баратындар азаймай отыр. Әр деңгейдегі басшылар қоғаммен бірге жаңаруға, құқықтық сауатын жетілдіруге талпынбаса, әділетті Қазақстанның өркендеуіне қалай үлес қосады?
Атырау облысы
