Суретті түсірген – Ерлан ОМАР, «EQ»
Мәселен, «Ауылдық медицинаны жаңғырту» ұлттық жобасымен 15 ауылдық елді мекенде медициналық мекемелердің жаңа ғимараты пайдалануға беріледі. Оның ішінде 9 медициналық, 5 фельдшерлік-акушерлік пункт, 1 дәрігерлік амбулатория бар. Мұндай нысандар Құрманғазы, Қызылқоға, Индер және Исатай аудандарында салынып жатыр. 2027 жылға дейін 24 медициналық нысан салу көзделіп отыр.
«Қазір Атырау облысында 11 нысанның құрылысы жүріп жатыр. Бұл қазіргі талапқа сәйкес келеді. Мәселен, Атырау қаласында үш қосалқы стансасымен қоса жедел жәрдем стансасы, онкологиялық диспансері үшін жаңа ғимаратпен радиологиялық корпус, Жұлдыз шағын ауданы мен Амангелді ауылында дәрігерлік амбулатория, Нұрсая және Өркен шағын ауданында емхана салынып жатыр. Мұнайлы шаһар маңындағы Қайыршақты ауылдық округіне қарайтын Талқайраң елді мекенінде де емхана ғимаратын салу көзделді. Бұған тұрғындар санының өсуі себеп болып отыр. Ал Жылыой ауданының Қарағай, Махамбет ауданындағы Аққайың ауылында медициналық пункт, Исатай ауданында фельдшерлік-акушерлік пункт, Құрманғазы ауданының Сүйіндік, Балқұдық ауылдарынан дәрігерлік амбулатория құрылысы қолға алынды», дейді облыстық денсаулық сақтау басқармасының басшысы Қайсар Абдалиев.
Жаңадан салынған дәрігерлік амбулаторияның бірі мұнайлы шаһардағы Жұлдыз шағын ауданында ашылды. Амбулаторияның ақжелеңділері 13 мыңнан аса тұрғынға медициналық көмек көрсетеді.
«Бұл дәрігерлік амбулаторияда зертхана мен күндізгі стационар бар. Осы кезге дейін мұндағы тұрғындар Геолог шағын ауданындағы емханаға қаралатын еді. Енді олар медициналық көмекті жаңа амбулаториядан алады. Бұдан былай Геологтегі емхананың жұмысы жеңілдеп, науқастарды қабылдау кезегі қысқарады. Осылайша, тұрғындардың сапалы медициналық көмек алуына жағдай жасалды», дейді басқарма басшысы.
Дәрігерлік амбулаторияда 18 кабинет бар. Оның ішінде күндізгі емхана, стоматология, физиотерапиялық емдеу бөлмелері зертханалық құралдар мен тіс емдеуге, өзге де медициналық қызметті көрсетуге арналған аппараттармен қамтылған. Мұнда 8 дәрігер мен учаскелік мейірбикелер, акушер-гинеколог пен тіс дәрігері жұмыс істейді. Амбулаторияның ақжелеңділері 3 «Haval M6» маркалы қызметтік көлігімен науқастардың шақыртуына жедел жетеді.
Жаңадан қолданысқа берілетін осындай нысандарда жұмыс істейтін кадр мәселесі қалай шешімін табады? Облыстық денсаулық сақтау басқармасы кадр жетіспеушілігін болдырмас үшін бірнеше бағдарлама әзірлепті. Біріншісі – біржолғы әлеуметтік өтемақы төлеу, екіншісі – қызметтік пәтер беру. Бұған қызығушылық танытқан 150-ге жуық маман өзге өңірлерден келуі мүмкін. Осыған байланысты биыл 100-ден аса медицина қызметкеріне әлеуметтік көмек көрсету жоспарланып отыр.
«Атырау облысында өткен жылдан бері өзге өңірлерден келген тәжірибелі және жас мамандарға біржолғы әлеуметтік өтемақы мен қызметтік пәтер беру бағдарламасы іске асырылып жатыр. Былтыр өңірде 103 медицина маманы әлеуметтік көмек алды. Мамандардың 40-қа жуығы аудандық, ауылдық мекемелерге жұмысқа орналасты. Ауылға жұмысқа барған мамандарға 5 млн теңге, ал Атырау қаласындағы медицина мекемелеріне қызметке орналасқандарға 3 млн теңге көмек берілді», дейді Қ.Абдалиев.
Оның айтуына қарағанда, биыл аталған жобаға өзгеріс енгізіледі. Мәселен, өтемақының мөлшері артады. Енді Атырау қаласында жұмыс істеуді қалаған мамандар әлеуметтік өтемақы ретінде 5 млн теңгені иеленді. Ал аудандардың орталығына жұмысқа барған медицина қызметкерлеріне берілетін өтемақы 7 млн теңгені құрайды. Ауылдардағы тұрғындардың денсаулығын жақсартуға үлес қосқысы келетін дәрігерлер үшін өтемақы 10 млн теңгеге жетеді.
«Бұл ұсынысты облыстық мәслихат қарауына ұсындық. Сала қызметкерлерінің тұрғын үй жағдайын жақсарту үшін «Отбасы банкпен» бірлескен жобамыз бар. Жобаға сәйкес медицина мамандары бастапқы жарнасын төлемей 20 жылға баспана сатып алуына болады. Үстеме мөлшері – 5 пайыз. Осындай қолдау көрсетілетін Атырау облысындағы кадр мәселесін оң шешу үшін медициналық жоғары оқу орындарымен тығыз байланыс орнатып, жас дәрігерлерді шақырып отырмыз», деді Қ.Абдалиев.
Атырауға келген жас маманның бірі – акушер-гинеколог Гүлфара Көктенова былтыр қазанда облыстық перинаталдық орталыққа жұмысқа орналасыпты. Желтоқсан айында әлеуметтік өтемақыны қолына алған.
«Ресейдің Астрахань қаласынан медицина университетінде оқып, акушер-гинеколог мамандығын Қазан қаласындағы жоғары оқу орнынан алып шықтым. Жергілікті әкімдік пен денсаулық сақтау басқармасы тарапынан медицина мамандарына көп қолдау көрсетіліп жатыр. Өзім жұмысқа орналасқаннан кейін көп кешікпей 3 млн теңге өтемақы алдым. Қазір біздің перинаталдық орталықта білікті мамандар көп. Тәжірибелі әріптестеріммен бірлесе жұмыс істеп, біліктілігімді арттырып жүрмін», деді Г.Көктенова.
Атырау облысы
