Фото: Ашық дереккөз
Салтанатты іс-шарада өңір басшысы Ербол Қарашөкеев жерлестерінің атынан былғары қолғап шеберін Олимпиада ойындарындағы күміс жүлдесімен құттықтады.
«Нұрбек төрт жылдың басты додаларында абыроймен өнер көрсетіп, халықтың жоғары сенімін ақтады. Қасиетті Әулие-Ата – еліміздің спорттық әлеуетін айғақтайтын ерекше өңір. Әлемдік аренада Қазақстан намысын қорғап жүрген спортшылардың дені Жамбыл облысының тумалары. Жамбыл – чемпиондардың туған жері, мықты бапкерлердің ордасы», деп атап өтті өңір басшысы спортшының ата-анасы мен бапкеріне ризашылығын білдіріп.
Сонымен қатар Ербол Қарашөкеев Олимпиада жүлдегеріне демеушілер есебінен сатып алынған Hyundai Sonata автокөлігінің кілтін табыс етті.
«Туған жеріміз Жамбыл облысына келдік. Ыстық ықыласпен күтіп алып, қолдап жатқандарыңызға рахмет. Үлкен белестер алда, мұнымен тоқтамаймыз. Келесі Олимпиада ойындарында қазақ елін қуантамын деп ойлаймын», деді Нұрбек Оралбай.
Айта кетейік, салтанатты іс-шарада облыстық мәслихаттың төрағасы Абдалы Нұралиев, Жамбыл облысының спорт ардагерлері кеңесінің төрағасы Тауырбек Қарауылтегі, Қазақстан Республикасының еңбек сіңірген жаттықтырушысы Дамир Буданбеков те сөз сөйледі.
Еске сала кетейік, осыған дейін Астана қаласының әкімі Жеңіс Қасымбек Нұрбек Оралбайға Land Rover Defender автокөлігінің кілтін, ал жаттықтырушысы Асқар Еркебаевқа 10 млн теңгенің сертификатын табыстаған еді.
