Бұл жоталардың жасырған сыры әлі толық зерттеле қойған жоқ. Сол себептен, Атырау облыстық тарихи-өлкетану музейі 7-18 тамыз аралығында палеонтологиялық экспедиция ұйымдастырды. Аталған экспедиция жетекшісі, география ғылымдарының кандидаты, профессор Қажымұрат Ахмеденовтің айтуынша, Жылыой ауданындағы тау жоталарының бор массивтеріне зерттеу жүргізіліпті.
«Зерттеу жұмысына далалық және камералық палеонтологиялық әдістерді қолдандық. Жоталарға зерттеу жүргізу кезінде 511 палеофауна мен палеофлора үлгілері жиналды. Оның ішінде омыртқалы тұқымдастардың 259, омыртқасыздар санатының 229, тасқа айналған 18 ағаш үлгісі бар. Экспедиция мүшелері мезозой дәуірінің жоғарғы бор кезеңіндегі бірегей қазба қалдықтарын тапты. Әсіресе 160 миллион жыл бұрын өмір сүрген бауырымен жорғалаушылардың омыртқалары мен палеоген акулаларының тістері мен омыртқалары, балықтардың құйрық қанаттары, тасқа айналған ағаштардың үлгілерін, 50 миллион жыл бұрынғы ірі otodus акулаларының тістерін құнды жәдігер ретінде бағалауға болады. Сондай-ақ белемниттердің, қосжарнақты малюскалар мен теңіз кірпілерінің бөліктері табылды», дейді Қ.Ахмеденов.
Ғалымның дерегіне қарағанда, палеофаунаның бірегей орны – Жылыой ауданындағы Шөлқара тау жотасы. Бұл аумақ аудан орталығы – Құлсары қаласынан оңтүстік-шығысқа қарай 130 шақырым қашықтықта орналасқан.
«Бұл жоталар әр кезеңде ғалымдардың назарын аударып келеді. Мәселен, 1931 жылы палеонтолог А.Рябининнің Қойқара қыратынан ерте бор дәуіріндегі динозаврдың омыртқаларын тапқаны қызығушылық тудырды. Оны Эмбазавр деп сипаттаған ғой. Бұл «Эмба кесірткесі» дегенді білдіреді. Біз Эмбазаврды Атырау облысының палеонтологиялық бренді, әлемдік ғылым үшін бірегей олжа деп санаймыз. Енді экспедиция материалдары өңделіп, оның нәтижелері бойынша ғылыми тұжырым жасалады. Алдағы уақытта Атырау облысының аумағында миллиондаған жыл бұрын өмір сүрген жануарлардың түрлерін анықтау, одан әрі зерттеу жұмыстарын жүргізу жалғасады», дейді Қажымұрат Ахмеденов.
Атырау облысы
