Президент Жолдауында берілген тапсырманы іске асыру аясында мамандардың жалақысын кезең-кезеңмен 60 пайызға көтеру үшін қосымша 1,2 млрд теңге қаражат жұмсалды. Бүгінде мамандардың орташа жалақысы 120 мың теңгеден 250–300 мың теңгеге дейін көтерілді.
Медицина саласында жылдам салынатын құрылыс орындары бюджетке де үнем әрі ұзақ уақытты талап етпейді. Осы ретте халықты көп толғандырған Талдықорған қаласында салынатын онкологиялық диспансердің жобасы дайын болды. Құны 10 млрд теңге шамасындағы үлкен әлеуметтік жобаны «Kazakhmys Holding» компаниясы іске асырады.
Атап өтсек, Мемлекет басшысы Қасым-Жомарт Тоқаев Жетісу облысына жұмыс сапары кезінде Талдықорған қаласындағы онкологиялық диспансердің материалдық-техникалық базасын нығайту туралы тапсырма берген еді. Соған сәйкес осы жылдың маусым айында облыс әкімдігі, Денсаулық сақтау министрлігі, «Kazakhmys Holding» инвестор-компаниясы Талдықорғанда онкологиялық орталық салу туралы үшжақты меморандумға қол қойған. Аталған уағдаластық негізінде инвестор өз қаржысына орталық ғимаратын тұрғызады, Денсаулық сақтау министрлігі заманауи материалдық-техникалық базамен қамтамасыз етеді, ал әкімдік өз тарапынан инженерлік коммуникациялық желілерін жүргізеді және ішінара құрал-жабдықтар алуға қолдау көрсетеді деп жоспарланып отыр.
«Онкологияны диагностикалау мен емдеу – бүкіл әлемдегі өзекті мәселелердің бірі. Сондықтан да оған мемлекет тарапынан басымдық берілген. Бұған дейін облыс әкімінің бастамасымен жаңа заманауи онкологиялық орталық салу туралы үшжақты меморандумға қол қойылды. Бұл жаңа орталықта пациенттерді емдеу және диагностикалаудың жаңа тәсілдері қолданылады. Емдеу барысында сызықтық үдеткіш, химиотерапияны емдеу әдістерін пайдаланатын интервенциялық хирургия қолданылады. Бұдан басқа, скрининг орталығы ашылады, бұл халыққа сапалы медициналық қызмет көрсетуге өзінің оң әсерін тигізеді», дейді облыстық денсаулық сақтау басқармасының басшысы Арман Жансеңгіров.
Сондай-ақ жаңа онкологиялық орталықта гематология, оңалту, фармакология бөлімшелері ашылып, радиология, химиотерапия, маммогинекология бөлімшелері жұмыс істейді.
Ауылдағы халық дегеннен шығады, әуелгі сәлемін «мал-жан аман ба?» деп бастайтын ағайынның бір мәселесі ветеринарлық пункттер екені бұған дейін айтылған. Осы мақсатта кейінгі жылдары мал емдеуге арналған заманауи мекемелер ірге жая бастады. Өңірде былтырдан бері жергілікті бюджет қаражатына 50-ге тарта блокты-модульді ветеринарлық пункт салынған. Материалдық базаны нығайту жағынан бұл – республика көлеміндегі үздік көрсеткіштердің бірі.
Өңір әкімі баспасөз қызметінің мәліметінше, өткен жылы блокті-модульді конструкциядан 24 ветпункт тұрғызылса, биыл 23 ветпункт салынып, пайдалануға беріледі. Мұндай құрылыс қысқа мерзім ішінде – шамамен 3-4 айда тұрғызылады. Жобалық-сметалық құжатты қажет етпейді. Құрылыстың құны едәуір арзан. Бұған қоса ветеринария мекемелерінің материалдық-техникалық базасын жақсарту мақсатында 26 автокөлік, 517 арнайы ветеринариялық құралдар, 113 компьютер жиынтығы және 117 дана ИСЖ базасына арналған планшет сатып алынып, арнайы мамандарға берілген.
Бұдан бөлек, кейінгі екі жылда ветеринарлық шараларды ұйымдастыру үшін облыстық бюджеттен 8,1 млрд теңге бөлінген. Осындай тұрақты қолдаулар жұмыс сапасына өзінің оң әсерін тигізіп отыр. Мәселен, Жетісу облыстық Ветеринария басқармасының басшысы Нұрлан Жамаубаевтың айтуынша, өткен 6 айда 426,5 мың ірі қара, 1 млн 286 мың бас ұсақ мал бруцеллезге қарсы тексеруден өткізілген.
«Мал шаруашылығы – облыс экономикасының негізгі басым бағыттарының бірі. Оған қоса ет пен сүт сапасы халықтың денсаулығына тікелей әсер ететін фактор. Сондықтан мал мен құстың жағдайын тұрақты бақылап отырамыз. Бұл ретте аса қауіпті аурулардың алдын алу бағытындағы вакциналаудың 6 айлық жоспары лайықты деңгейде орындалды», дейді Н.Жамаубаев.
Жалпы, облыс бойынша аудан, қалаларда 10 ветеринарлық станса мен 118 ветпункт бар. Онда 1 100 маман еңбек етеді. Ветеринарлар ауыл шаруашылығы жануарлары мен құстардың аса қауіпті ауруларының 16 түрі бойынша ветеринарлық-профилактикалық іс-шаралар атқарады. Алдағы уақытта қосымша осы салаға арналған блокты-модульді нысандар салынады.
Жетісу облысы
