Материалдық көмектің жалпы сомасы 4 млн теңгені құрайды. Жомарт жандар балаларға қызықты ойын-сауық бағдарламасын да ұсынды. Игі іс-шараның ашылу салтанатына Астана қаласы Ішкі саясат басқармасының басшысы Нұрдәулет Әлмұханов қатысып, акцияға қолдау көрсеткен барлық жанашыр жанға алғыс білдірді.
– «Мектепке жол» республикалық акциясы жыл сайын дәстүрлі түрде жалғасып келеді. Бұл акция Астана қаласының Қазақстан халқы Ассамблеясының қолдауымен өтіп жатыр. Балаларға мектепке қажетті барлық құрал-жабдық берілді. Осы орайда акцияға атсалысып, көмек көрсеткен демеушілерге алғысымды білдіремін, – деді басқарма басшысы.
Жыл басынан бері қалалық Ассамблея мүшелері көрсеткен қайырымдылық және гуманитарлық көмектің жалпы сомасы шамамен 49,5 млн теңгені құрайды. Өз кезегінде Астана қаласы ҚХА Ақсақалдар кеңесінің мүшесі Әміржан Әлпейісов акцияның мақсатына тоқталды.
– Біздің көздегеніміз – оқушыларды мектепке қажетті барлық құрал-жабдықпен қамтамасыз ету, тұрмыс жағдайы төмен және көпбалалы отбасыдан шыққан балаларға жаңа оқу жылы аясында әлеуметтік қолдау көрсету, – деді ол.
1 тамыздан 30 қыркүйекке дейін аз қамтылған, көпбалалы отбасылар, жетім балалар және ата-анасының қамқорлығынсыз қалған балалар қатарындағы білім алушыларға «Мектепке жол» республикалық акциясы аясында демеушілік қаражаты есебінен керек-жарақтары бар мектеп сөмкелері түрінде көмек көрсетіледі. Игі іс аясында барлығы 8 500-ден аса баланы қамту жоспарланып отыр.
