Қала әкімі Мұрат Бөрібаевпен бірге меморандумға «Stecol Сorporation» жетекшісі Янг Хонвэй және «Siena» компаниясының директоры Руслан Шарипов қол қойды. Әкім қызметіне шілде айының бас кезінде тағайындалған Мұрат Бөрібаев қала бюджеті небәрі 11 млрд теңге екенін айтып, қазынаны толтыру басты міндет деген еді. Жаңа басшылық іс орайын тапқан секілді. Талай жыл жырға айналған «Жезқазған – Қызылорда» көлік жолының күрделі жөндеуі ақыры басталатын болды. 8 лотқа бөлінген жұмысты қытайлық 4 компания жеңіп алды. «Stecol Сorporation» – сол 4 компанияның бірі. Ал «Siena» – Қытайдың осы компаниясымен бірнеше жылдан бері серіктес болып келе жатқан отандық компания.
Жол салуға құм да, қиыршық тас та керек. Сәтін салғанда, Сәтбаев қаласының аумағында осының бәрі де табылады. Қала әкімі дереу «Stecol Сorporation» компаниясының басшылығына хабарласады. «Жол құрылысына қажетті материалдарды бізден алады екенсіздер, ендеше неге екіжақты тиімді жұмыс істемеске? Сіздер біздің қалаға тіркеліңіздер, салатын зауыттарыңызға тиісті жер бөліп беруге әзірміз» деген әкімнің ұсынысы компанияның да көңілінен шыға келді. Сөйтіп, «Stecol Сorporation» өзінің сенімді серіктесі «Siena» компаниясымен бірге Сәтбаев қаласына келді.
«Біздің тарапымыздан қытайлық «Stecol Сorporation» компаниясына қызығушылық танытуымыз бекер емес. Өйткені бұл компания – Қытай еліндегі атақты «China Power» мемлекеттік корпорациясының еншілес құрылымы. Компания елімізде жұмыс істеген үш жыл ішінде өзін сенімді және жауапты серіктес ретінде көрсете білді. Ал «Siena» – отандық құрылыс нарығында орны бар, алдыңғы санатты компания. Олар жол құрылысына қажетті материалдарды жеткізумен айналысады. Қосалқы мердігер ретінде жөндеу жұмыстарына да тікелей араласады. Сондықтан бірімен-бірі байланысты қос компанияны бірге жұмыс істеуге шақырдық. Ұсынысымызды қабыл алғаны үшін аталған компания басшыларына қала халқының ризашылығын жеткізгім келеді», дейді Мұрат Бөрібаев.
Компаниялардың қалаға келіп тіркелуі салық түсімін молайтып қана қоймай, жаңа жұмыс орындарының ашылуына түрткі болады. Қаныш қаласына келген қос инвестор қалада асфальт-битум зауытын тұрғызады. Мұнда кем дегенде жаңа 30 жұмыс орны ашылады. Сонымен бірге сыйымдылығы 0-15 мың тонна болатын битум қоймасын салады.
«Жол құрылысына жақын жерден зауыт пен қойма салу өте пайдалы. Бұл өз кезегінде тасымал шығындарын азайтады. Сонымен қатар құрылыстың неғұрлым жедел жүргізілуіне де ықпалын тигізеді. Зауытқа қажетті шикізаттарды да қолсозым жерден аламыз. Сәтбаев қаласы басшылығының ұсынысына көп ойланбастан келісім бергеніміз де сондықтан», деді меморандумға қол қою салтанаты кезінде сөз алған инвесторлар.
Бір сүйсінерлігі, инвесторлар қаланың әлеуметтік-мәдени өміріне, инфрақұрылымына, кескін-келбетіне өз үлестерін қосуға ниетті. Айталық, компаниялар қала көшелерінің жолын жөндеуден өткізуге, демалыс аймақтарын және балалар ойын алаңдарын салуға да қатысып, қаржы құюды көздеп отыр. «Біз осылайша қалада қолтаңбамызды қалдырғымыз келеді» дейді.
Қос бірдей инвестордың келуі Сәтбаев қаласының экономикасын дамытуға ойдағыдай оң әсерін тигізетіні күмәнсіз.
Ұлытау облысы,
Сәтбаев қаласы
