Петропавлдағы мектеп-интернат жыл үздігі атанды

ПЕТРОПАВЛ. 26 қаңтар. Есту кемістігі бар балаларға арналған Солтүстік Қазақстан облыстық арнайы мектеп-интернаты 2014 жылдың үздік мекемесі атанып, ұлттық сертификатпен, ұжым директоры Жанкелді Тәжин «Еңбек сіңірген мемлекеттік қызметкер» орденімен марапатталды. Бұл туралы egemen тілшісі хабарлады. Республика орта буындағы кәсіпорындардың соңғы екі жыл ішіндегі жұмыс көрсеткіштерінің қорытындыларын «Экономикалық қызмет түрлерінің жалпы классификаторы» негізінде «Сауда-өндірістік» ЖШС жүргізген. Статистикалық бағамдау Статистика агенттігі төрағасының бұйрығымен бекітілген. Есту қабілеті кем балалар тәрбиеленетін мектеп-интернат экономикалық қызмет түрлерінің жалпы классификаторы бойынша негізгі және орта білім мекемелері арасында алғашқы үздік қатарына кірді. Көшбасшы кәсіпорындар тізімі халықаралық WRC ұйымының әдістемелік жүйесі негізінде айқындалған. Мектеп-интернат сайтына орналастырылған, баспасөз беттерінде жарияланған материалдарға, оқушылар мен ұжымның жетістіктеріге, мен білім ошағында жүргізілген оқу-тәрбиелік жұмыстар мен тағы басқа атқарылған шараларға сырттай іріктеу жүргізіліп, рейтинг қорытындысы бойынша топ жарған. 2014 жылдың ең үздік мекемесі Астана қаласында өтетін марапаттау рәсіміне шақырылып отыр. Өмір Есқали. Дерек: egemen.kz. Сурет: deaf.kz.