Қазіргі уақытта Салық кодексінде арнаулы салық режімінің 7 түрі қарастырылған. Оның 4 түрі – шағын кәсіпкерлік субъектілеріне, 2 түрі – ауыл шаруашылығы өнімдеріне, 1 түрі бөлшек сауда салығы шағын және орта бизнеске арналған.
Кәсіпкерлікті дамытуға қолайлы жағдай жасау мақсатында Салық кодексінде жекелеген салықтарды есептеу және төлеу тәртібін жеңілдету көзделіп отыр. Сондай-ақ бұл режімдер жеңілдік мөлшерлемелерін және салық жүктемесін азайтуға бағытталған басқа да тетіктерді белгілейді.
Мемлекет басшысы Қазақстан халқына Жолдауында салық режімдерін оңтайландыруды тапсырды. Осы мақсатта жаңа Салық кодексінде арнаулы салық режімдерінің үш түрі ұсынылады:
1) өзін-өзі жұмыспен қамтығандарды (жеке тұлғаларды жеке табыс салығын төлеуден босату, арнайы мобильді құрылғылар бойынша әлеуметтік төлемдерді есептеу);
2) оңайлатылған декларация негізінде (оңайлатылған декларация мен бөлшек сауда салығын біріктіру);
3) шаруа және фермер қожалықтары бойынша (қолданыстағы тәртіп сақталды, бірыңғай жер салығының жойылуына байланысты салық тек жеке табыс салығы түрінде төленетін болады). Мемлекет басшысының Қазақстан халқына Жолдауына сәйкес жаңа Салық кодексін қабылдау келесі жылға шегерілді.
Жаңа Салық кодексінің жобасы аясында салықтық әкімшілендіруді оңайлатуға және цифрландыруға ерекше көңіл бөлінген. Негізгі мақсат – салық төлеушілердің салық міндеттемелерін қарапайым орындауы. Қарым-қатынастың бұл форматын қолдану салықтық әкімшілендіруді жеңілдетіп қана қоймай, салық төлеушілерге хабарламалар мен мемлекеттік қызметтерді жеделдетіп алуға мүмкіндік береді.
Сейілжан Ахметов,
Қаржы министрлігі Мемлекеттік кірістер комитеті төрағасының орынбасары
