Жол қауіпсіздігін қамтамасыз ету іс-шараларына Полиция департаменті мен Төтенше жағдай қызметінің дрондары пайдаланылады. Ұшқышсыз әуе аппараты 50 шақырымға дейін бара алады. Жылдамдығы сағатына 100 км-ға дейін жетеді. Жол ережесін бұзған көліктің нөмірін 2 шақырым қашықтықтан анықтап, жадына тіркеп қояды.
Тәртіп сақшыларының айтуынша, дрондар әуеде жұмыс істеген екі күн ішінде рұқсат етілмейтін жерде қарсы жолға шығып кеткен 6 жүргізуші ұсталған. Оның біреуі заңсыз жолаушы тасымалдаумен айналысып жүргені анықталды. Жол тәртібін бұзғандардың бәрі алты ай мерзімге дейін жүргізуші куәлігінен айырылуы мүмкін.
«Мысалы, 15 қыркүйек күні түстен кейін квадрокоптер қарсы жолаққа шығып кеткен «Jac Sanray» автокөлігін тіркеді. Жол ережесін бұзған 35 жастағы жүргізушіге қатысты материалды полицейлер сотқа фото және бейнедәлелдермен бірге жіберді», дейді облыстық ПД баспасөз хатшысы Карина Базарбаева.
Сонымен қатар дрондар қауіпсіздік белдігін тақпайтын, жол сызығы мен жол белгілерін ескермейтін, көлік жүргізіп келе жатып ұялы телефонмен сөйлесетін жүргізушілерді де анықтайды.
Облыстық полиция департаменті жүргізушілерді мұқият болуға, жол қозғалысы ережелерін сақтауға шақырады.
Қостанай облысы
