Қатысушы елдер саны бойынша аталған білім бәсекесі халықаралық математика олимпиадасынан кейінгі екінші үлкен ғылыми сайыс. Еліміздің құрама командасы информатика жарысына биыл жиырма жетінші рет қатысып отыр.
Биыл үздік нәтиже көрсеткен Қазақстан командасының құрамында Атырау облыстық №1 «Білім-Инновация» лицей-интернатының 11-сынып оқушысы Мансұр Таймас, Алматы қаласындағы Республикалық физика-математика мектебінің 10-сынып оқушысы Максим Цой, Алматы қаласындағы Республикалық физика-математика мектебінің 11-сынып оқушысы Назар Серазитдинов, Қызылорда облыстық «Білім-Инновация» лицей-интернатының 10-сынып оқушысы Ахмет Иса бар.
«Аталған байқау екі күннен тұрады, онда қатысушыларға алгоритмдік есептерді шешу және бағдарламалау тапсырмалары берілген. Оқушылар жеке дара бақ сынайды. Айта кетерлігі, әр елден өздерінің ұлттық олимпиадаларында жеңімпаз атанған төрт оқушы қатысады. Қазір халықаралық деңгейдегі беделді 7 олимпиада бар. Олар математика, физика, химия, информатика, география, лингвистика, биология пәндерінен жыл сайын өтеді. Соның бірі – халықаралық информатика олимпиадасы. Аталған білім бәйгесі алғаш рет 1989 жылы өтті. Ал Қазақстан құрама командасы бұл сайысқа 1998 жылдан бері қатысып, 3 алтын, 27 күміс және 41 қола медальға қол жеткізді», дейді Дарын республикалық ғылыми-практикалық орталығы директорының орынбасары Нұрлан Жұмагелді.
Бұл жетістікпен оқушыларымыз биылғы жеті беделді халықаралық олимпиадаларға қатысуын қорытындылайды. 2023-2024 оқу жылының нәтижесі бойынша еліміздің ұлттық құрамасы IMO (математика), IPhO (физика), IBO (биология), IChO (химия), IOL (лингвистика), IGeO (география) және IOI (информатика) сайыстарына қатысып, 2 алтын, 12 күміс, 12 қола медаль және бір дипломға ие болды.
