Гюмридегі ескерткіш түбінен орыс солдатының мәйіті табылды

АЛМАТЫ. 15 маусым. Гюмри қаласында (Армения) жайласқан 102 ресейлік әскери базасында төтенше оқиға болды. Әскери қызметке кіріскеніне үш ай болмаған солдаттың өлі денесі бүгін таңертең қаладағы «Армения анасы» ескерткішінің түбінен табылды. Бұл туралы Интерфакс хабарлады. Жас жауынгер Иван Новиковтың пышақталған мәйіті туралы хабарды Арменияның ішкі істер министрлігі тергеу комитетінің баспасөз-хатшысы Сона Трузян растады. Гюмриде орналасқан ресейлік әскери база тынышталмай тұр. Наурыз айында Ресей шекара әскерінің солдаты Артур Афян асылып қалған. Жылдың басында, яғни 12 қаңтар күні шекарадан өтіп кетпек болған орыс солдаты қаладағы Аветисян отбасын автоматпен түгелдей қырып кеткен болатын. Қазір болған оқиғаға байланысты тергеу жүргізіліп жатыр. Талғат Сүйінбай. Дерек, сурет: Интерфакс.