Сурет: primeminister.kz
Вице-премьер «Үлкен жоба» бойынша 2,5% жылдық жеңілдікпен несие алған жаңа тауарлы сүт фермаларының құрылысымен танысты. Мәселен, «Восток-1» ЖШС 1,2 мың мал басына арналған жобаны аяқтап жатыр. Аталған серіктестік құрамында ауылшаруашылық дақылдарын өсірумен, тұқым селекциясымен, асыл тұқымды мал шаруашылығымен айналысатын өндірістер бар. Облыс әкімі Құмар Ақсақалов бұл Қостанай облысында «Үлкен жоба» бойынша салынатын алғашқы заманауи ферма екенін атап өтті. Аталған жоба аясында өңірде алты ТСФ салынып жатқанын айта кету керек. Олардың үшеуі биыл, ал үшеуі келесі жылы пайдалануға беріледі. Жалпы, облыс бойынша 2023 жылы 202 мың тонна сүт өндіріліп, оның 172 мың тоннасы немесе 85%-ы қайта өңделген. Ал биылғы 8 ай ішінде 165 мың тонна сүт өндіріліп, 140 мың тонна (84%) өңделген.
Вице-премьер жұмысымен танысқан «S-Agro-Borovskoe» ЖШС былтыр Каменскуральск кентінің маңында бие сүтін сублимациялау зауытын іске қосты. Бұл – «Local food» брендімен құрғақ саумал шығаратын «Zollmann» неміс компаниясымен бірлескен кәсіпорын. Неміс сублимация технологиясы жаңа сауылған бие сүтін -72°C температураға дейін қатыру арқылы оның барлық пайдалы қасиеттерін сақтауға мүмкіндік береді. Кәсіпорынның қуаты тәулігіне 120 кг құрғақ сүт шығаруға жетеді. 2024 жылдың қаңтар-тамыз айларында «S-Аgro-Borovskoe» 5 тонна құрғақ сүт өндіріліп, өнім Астана және Алматы базарларына және дәріхана желілеріне жіберілген. Кәсіпорын басшысы Амангелді Сарбасовтың айтуынша, биыл саумал негізіндегі косметика өндірісіне арналған жабдықты (қолға, бетке арналған крем, сабын, сусабындар және т.б.) орнату жоспарланып отыр. Кәсіпорынның неміс серіктесі «Zollmann» бұл косметиканы Еуропада шығарады, ол үлкен сұранысқа ие, бірақ Германияда өндірісті кеңейтуге мүмкіндік жоқ. С.Жұманғарин «S-Аgro-Borovskoe» ЖШС иесіне аталған жобаны кеңейтуді ұсынды. Экспортқа жылқы етін өткізу нарығы кенжелеп тұрғаны белгілі. Алайда құрғақ бие сүті негізінде өнім өндіру елімізде жылқы шаруашылығын одан әрі дамытуға жол ашады. Вице-премьер Сауда және интеграция министрлігіне жаңа өнімді Қытай нарығына шығаруға жәрдемдесуді тапсырды.
Меңдіқара ауданының егіс алқабында вице-премьер Серік Жұманғарин Қостанай облысының фермерлерімен кездесті.
«Біз фермерлерді қолдау көлемін біртіндеп арттырып жатырмыз. Атап айтқанда, көктемгі-күзгі дала жұмыстарына жеңілдігі бар қаржыландыру көлемін 700 млрд теңгеге дейін ұлғайтамыз, оның шамамен 40%-ы «Даму» қоры арқылы кепілдендіріледі. Ауыл шаруашылығы техникасын лизингке кредиттеу көлемі 100 млрд теңгеден 200 млрд теңгеге дейін өседі. Нәтижесінде, жыл сайынғы жұмыстарды қамтамасыз ету үшін фермерлерді қолдау сомасы 900 млрд теңгеге дейін ұлғаяды. Биыл біз 2025 жылғы көктемгі егіс жұмыстарын қаржыландыруды бастаймыз», деді С.Жұманғарин фермерлерге.
Вице-премьер қызметімен танысқан тағы бір нысан қостанайлық жылқы тұқымын өсірумен айналысатын «Қазақ тұлпары» ЖШС болды. Қазақы жылқы тұқымын сақтап, насихаттаудың маңызын назарға ала отырып, вице-премьер Ауыл шаруашылығы министрлігіне елімізде құрылып жатқан Жылқы шаруашылығы институтының базасында жеке қаражат есебінен жылқы зауытын жаңғырту бағдарламасын дайындауды тапсырды.
Қостанай облысы
