Шымкент қаласында миллионнан астам халық бар. Демек зейнеткерлердің де саны әжептәуір. Оларға жағдай жасау – жергілікті атқарушы биліктің басты міндетінің бірі. Кеңестік дәуірде мегаполис аумағында қаншама зауыт-фабрика, мекемелер салынды. Әлеуметтік нысандар мен көпқабатты тұрғын үйлер бой көтерді. Тәуелсіздіктің алғашқы жылдарында құрылыс жұмыстары қарқынды жүргізіліп, қаланы көркейту бағытында да көп жұмыс атқарылды. Міне, осы жұмыстардың бәріне де белсене атсалысқан бүгінгі зейнет жасындағы аға-апаларымыз. Сондықтан оларға қандай жағдай жасалса да жарасымды. Мемлекет тарапынан түрлі қолдау, көмек шаралары жүйелі ұйымдастырылып келеді.
Мәселен, Шымкентте бұл күнде «Белсенді ұзақ өмір» орталығы қарттарға жан-жақты қызмет көрсетеді. Мұндай мекеме шаһарда біреу емес, үшеу. Енді бұйыртса, төртіншісі ашылғалы жатыр. Олардың бәрі де жұмыспен қамту және әлеуметтік қорғау басқармасына қарайды. Басында 2019 жылы «Асыл жүрек» әлеуметтік-медициналық орталығы болып ашылған мекеме атауы 2021 жылы есімін қазіргі атауына өзгертті. «Белсенді ұзақ өмір» орталығының әлеуметтік қызметкері М.Арысбаеваның айтуынша, күн сайын сегіз жүзден астам зейнеткер екі мезгіл – таңертеңнен түске дейін, түстен кешке дейін қаладағы 3 орталықта көңіл сергітіп, демалып, медициналық ем-домдар қабылдайды. Массажға барады, йогамен айналысады, таңғы жаттығулар жасайды, тренажерлік залда шынығады. Одан бөлек шахмат, дойбы ойнап, бильярдтан кіші турнирлер өткізіп, үстел теннисінде жарысып, көңіл сергітеді. Медицинада денемен бірге миды жаттықтыру да пайдалы. Әсіресе ол зейнет жасына келген қартаң кісілерге өте керек. Сол себепті ардагерлер ойын, физикалық қимыл-әрекеттен бөлек, кітап оқып, бейнелеу өнері, қыш өнері бөлмелерінде шығармашылығын шыңдап, рухани ләззат алады. Сонымен бірге әртүрлі танымдық тақырыпта көркем фильмдер тамашалап, караокеде ән салып, көңіл көтереді. Ең бастысы, тек ғимарат ішінде қамалып қалмай, аптаның әр жұмасында дендросаябаққа барып, түрлі жаттығу жасап, денсаулықтарын нығайтады. Мұнда тек зейнет жасындағы азаматтар ғана емес, Екінші дүниежүзілік соғыс ардагерлеріне теңестірілген жандар да демала алады.
Бүгінде жасы 65-ке келген, талай жыл құқық қорғау саласында еңбек етіп, полиция майоры шенімен зейнеткерлікке шыққан Ағмен Жұмабаев та осы орталықтың тұрақты қызметін көріп жүрген жандардың бірі. Қазіргі таңда Қарттар күніне орай арнайы концерттік қойылым дайындап жатыр.
«Өзім полицияда жұмыс істесем де, өнерге бір табан болдым. Ән салғанды, музыкалық аспапта ойнағанды жақсы көремін. Сонымен бірге спортты да жанымнан тастаған емеспін. Орталықта үстел теннисін ойнап тұрамын. Одан бөлек, шығармашылықпен айналысамын. Шынын айтқанда, бұл жер менің талантымның кәдімгідей тынысын ашты. Қарияларға осындай қызмет ұйымдастырған мемлекетке көп рахмет. «Адам қартайғанда үйге сыймайды» деген рас. Кейде бір жерге барып, құрдастармен әңгімелесіп, көңіл сергіткің келеді. Орталық – жалғыздықтан қажыған жандарға нағыз таптырмас орын», дейді ол.
ШЫМКЕНТ
