Оңтүстік Американың оғландары 2016 жылы Колумбияда әлем чемпионы атанды. Шешуші тұста олар Ресейден 5:4 есебімен басым түсті. 2021 жылы Литвада ұйымдастырылған әлем чемпионатында күміс медаль иеленді. Финалда 1:2 есебімен Португалияға есе жіберді. Америка кубогінде 13 рет (3 алтын, 7 күміс, 3 қола) жеңіс тұғырына көтерілді.
Аргентиналықтармен Қазақстан құрамасы үш рет кездесті. 2016 жылы Колумбиядағы дүниежүзілік доданың топтық турнирінде бәсеке тағдырын Аламиро Вапораки соққан жалғыз гол шешті – 1:0. Келесі жылы Бангкоктағы «Король кубогі» жолындағы жарыста жолымыз қайта қиысты. Бұл жолы тең тарастық – 0:0. Биыл 8 қыркүйекте Алматыдағы Балуан Шолақ атындағы спорт сарайында жолдастық кездесу өткіздік. Бұл матч 3:2 есебімен жерлестеріміздің пайдасына шешілді.
Ташкентте өткен бәсекені тамашалау үшін «Хумо Аренаға» 12 000 көрермен жиналды. Бұл кешен дәл осынша адамды ғана сыйдыра алады. Яғни барлық билет сатылып кеткен. Бұған дейінгі осы жарыстағы бірде-бір матч дәл осынша жанкүйерді жинамаған еді. Солардың барлығы Қазақстан құрамасына қолдау көрсетті деп айтсақ, еш қателеспейміз. Тек бір-екі жерде ғана Аргентинаның туы жылт еткені болмаса, сол кеште «Хумо Аренада» қазақтың көк байрағы көздің жауын алды.
Кездесудің алғашқы минуттарында Рикардо Кака алаңға Игита, Ақжол Дәрібай, Лео, Дәурен Тұрсағұлов және Дугласты шығарды. Аргентинада да бес серкесіне сенім артты. Бірінші кезең алма-кезек шабуылмен өткенімен, есеп ашылмады. Үзілістен кейін бәрі 180 пайызға өзгерді. Екінші тайм басталғанына 1 минут 59 секунд өткенде Матиас Роза есеп ашты – 1:0. Арада бес минут өткеннен кейін Шыңғыс Есенаманов допты артқа бермекші болып оны Игитадан асырып жіберді де, өз қақпамыздың бағанасына тигізді. Сол кезде алғырлық танытқан Анхель Клаудино екінші голды соқты – 2:0. Көп ұзамай Арнольд Кнауп допты қолмен тоқтатып, төреші пенальти белгіледі. Қолайлы нүктеден Кевин Арриета мүлт кеткен жоқ – 3:0. Содан кейін-ақ Қазақстан футзалшыларының ойынынан береке кетті. Олар Игитаны алмастырып, алаңға тағы бір ойыншы шығарып әлек болды. 32 минутта Себастьян Корсо допты бос қақпаға бағыттады – 4:0. Әйтеуір ретін тауып, Дәурен Тұрсағұлов бір голды өз еншісіне жазды – 4:1. Бірақ онымен аргентиналықтар тоқтап қалған жоқ. 34-минутта Лукас Боло-Алемани мергендік танытты – 5:1. 36 минутта ережені өрескел бұзғаны үшін Тұрсағұлов алаңнан қуылып, пенальтиді Кевин Арриета сәтті орындады – 6:1. Сөйтіп, Қазақстан құрамасының әлем чемпионатындағы жорығы аяқталды.
Жартылай финалда Аргентина Франциямен күш сынасады. Ширек финалда француздар Парагвайды (2:1) ұтты. Сондай-ақ екінші жартылай финалда Бразилия мен Украина командалары ойнайды. Бұл бәсекелер 2, 3 қазанда өтеді. Бразилиялықтар Мароккодан (3:1) басым түссе, украиналықтар Венесуэланың (9:4) тас-талқанын шығарды.
