Көрме музейдің археология, этнография, фотоқұжаттар қорында сақталған бірегей жәдігерлер негізінде жасақталған. Орталық музейде Кемел Ақышевтің шығармашылығы мен өмір жолына қатысты 160-тан астам экспонат бар. Ғалым өміріндегі басты оқиғаларды бейнелейтін фотосуреттер мен марапаттар да көрме төрінен орын алған.
Қазақстан археологиясының тарихы К.Ақышевтің есімімен тығыз байланысты десек, ел аумағында жүргізілген ең ауқымды археологиялық қазба жұмыстарында табылған таңдаулы жәдігерлер ғалымның табанды ізденісінің жемісі.
К.Ақышев 1951-1952 жылдары басқарған Нұра экспедициясының Нұра, Шерубай-Нұра, Жақсы мен Жаман Сарысу өзендері аңғарларындағы қорымдардан жиналған материалдар, Жетісу аумағындағы үйсіндердің материалдық мәдениетін бейнелеуге, оның эволюциясын бақылауға мүмкіндік беретін ескерткіштерден жинастырылған жәдігерлер, Бесшатыр қорғанындағы жерлеу орнынан алынған Тянь-Шань шыршасының бірнеше бөренесі де экспозиция төрінен орын алған.
Әсіресе 1956-1991 жылдардағы Жетісу археологиялық экспедициясының материалдары айрықша мәнге ие. Сақтардың Сарытоғай қонысынан алынған материалдар (б.з. I-III ғ.), 1985 жылы түсірілген қыстаулардың топографиялық жобалары, суару құрылыстары, су диірмендері, ірі тас блоктардан жасалған қоршаулардың суреттері, әртүрлі кезеңге жататын Сұлу Қоян қорымының қазба материалдары, 1982 жылдың көктемінде Шеңгелді ауылының шетінен анықталған XIII-XIV ғасырларда өмір сүрген белгісіз Шыңғыс әулеті билеушісінің жерлеу орнына қатысты жәдігерлерді осы көрмеден тамашалай аласыз.
Көрменің ашылу салтанатында Мемлекеттік орталық музей директоры Рашида Харипова, отандық гуманитарлық ғылымның дамуына және әлемдік мәдениетке зор үлес қосып, музей қорын баға жетпес қазыналармен байытқан Кемел Ақышевтің тұлғасы мен шығармашылық мұрасы жас ізденушілер үшін үлкен зерттеулерге сұранып тұрған мазмұнды тақырып екенін атап өтті.
Сонымен қатар іс-шара барысында тарих ғылымдарының докторы Зейнолла Самашев, Ұлттық ғылым академиясының академигі Жәкен Таймағамбетов, тарих ғылымдарының докторы Александр Подушкин, ғалымның қызы Зарина Кемалқызы сөз сөйлеп, қайраткер ғалымның еңбек жолы мен өміріне қатысты тың естеліктермен бөлісті.
АЛМАТЫ
