Бұл – әділетті Қазақстан, әділетті экономика, әділетті қоғам құру жолында атқарылып жатқан саяси іс-шаралардың ең өзектісі. Сондықтан мен де отбасыммен бірге дауыс беру учаскесіне барып, таңдауымды жасадым.
Мемлекет басшысы егер халық АЭС салуды қолдап дауыс беріп, оң шешім қабылданған жағдайда оның құрылысын ірі-ірі халықаралық компаниялардан тұратын консорциум құру арқылы жүргізуді айтқан еді. Мұндай жағдайда станса құрылысы әрі сапалы, әрі салу мерзімі қысқа болуы мүмкін. Осы орайда халқымыз дұрыс таңдау жасайды деп үміттенемін.
Өйткені қазіргі таңда өнеркәсіп орындарының көбейіп, ұлғаюына байланысты электр қуатына қажеттілік артып келеді. Мамандардың айтуынша, 2035 жылға дейін оны пайдалану көлемі қазіргіден екі есеге өседі. Сондықтан электр энергиясын өндіруді де екі есеге арттыруымыз керек. Осы орайда мемлекетіміз арнайы жұмысты атқарады деп ойлаймын. Жаңартылатын энергия көздері, АЭС, одан өзге де энергия өндіру тетіктерін іздеу арқылы әлемдік экономикадағы орнымызды табамыз. Осындай ірі жобаларды атқару аясында ғылым мен білімге даңғыл жол ашамыз. Бұл бағыттағы жұмыс жүйелі түрде жүзеге аса береді. Ең бастысы, бейбіт заман болсын, басымыздан тыныштық кетпесін!
Ғалиасқар САРЫБАЕВ,
Сенат депутаты
