– Республикалық референдумға тыңғылықты дайындықпен келдік. Облыста 681 сайлау комиссиясы болса, референдумда соның 510-ы, яғни құрамында 3 220 мүшесі бар 14 аумақтық референдум комиссиясы және 496 учаскелік референдум комиссиясы жұмыс істеді. Комиссия мүшелері алдын ала толық оқытылды. Олардың 74,8 пайызы бұрын да сайлау өткізген, тәжірибелі мамандар, – дейді Батыс Қазақстан облыстық аумақтық референдум комиссиясының төрағасы Әділ Жоламанов.
Облыс бойынша дауыс беру Орал қаласында орналасқан Ұлттық ұланның 5517 әскери бөлімінде басталды. Ұлан сарбаздары ертемен жауынгерлік қызметке аттанатын болғандықтан, №479 дауыс беру учаскесі таңғы сағат 06.00-де ашылды. Дауыс беру орнына алғашқылардың бірі болып Ұлттық ұлан «Батыс» өңірлік қолбасшы генерал-майор Бекайдар Қазкеев пен 5517 әскери бөлім командирі подполковник Өміржан Сахатов келіп дауыс берді.
Ал Батыс Қазақстан облысының әкімі Нариман Төреғалиев Оралдағы Ақпараттық технологиялар колледжіндегі учаскеде таңдауын жасады.
«Мен де дауыс беру учаскесіне келіп, азаматтық борышымды өтедім. Еліміздің әр тұрғыны дауыс беру учаскелеріне келіп, таңдауын жасай алады. Облыс тұрғындары өздерінің азаматтық позициясын белсенді көрсетеді деген сенімдемін», деді Н.Төреғалиев.
Мәліметтерге қарағанда, облыс бойынша әдеттегідей ауыл тұрғындары белсенділік танытқан. Мысалы, Шыңғырлау ауданына қарасты Ақсуат ауылында тұратын кәмелет жасындағы 90 адам бір сағат ішінде дауыс беруді аяқтаған. Ауыл болып 100 пайыз дауыс бергендер қатарында Қазталов ауданындағы Оразғали ауылы, Жәнібек ауданындағы Майтүбек ауылдары да бар.
Өңір бойынша ең қария сайлаушы да Шыңғырлауда екен. 104 жастағы Нұрсұлу Тоқжанованың үйіне №424 референдум комиссиясының мүшелері жылжымалы жәшікті жеткізіп, дауыс беруіне мүмкіндік жасаған.
Жалпы, облыс бойынша референдум өте ұйымшылдықпен өтті. Дауыс беретін жерге ұлттық киіммен келген бәйтеректік келіндер тобы, Мичурин ауылындағы байкерлер, референдумға 100 пайыз қатысқан теректілік білім саласы өкілдері көзге түсті.
Батыс Қазақстан облысы
