«Жастар рухы» жастар қанаты таңертеңнен бастап Қонаев қаласының орталық көшелеріндегі үгіт-насихат парақшалары мен жарнамалық материалдарды жинап шықты. Осылайша, аймақтағы белсенділер бірлесе қоғамдық орындарды қалпына келтіру жұмыстарын жүргізді. Нәтижесінде, науқанның алғашқы күнінде-ақ Алматы облысының бірнеше ауданындағы көшелер тазаланып, үгіт-насихат материалдары толығымен алынды. Оң бастама әлеуметтік желі қолданушыларын да бейжай қалдырмады.
– Бұл акция партияның науқаннан кейін де қоғамға қызмет ететінін аңғартады. Референдум сияқты үлкен саяси оқиғадан кейін тазалықты сақтау – халық алдындағы жауапкершіліктің бір көрінісі. Науқан кезінде көшелер мен қоғамдық орындарға ілінген үгіт-насихат материалдары халыққа маңызды ақпарат жеткізді. Бірақ науқан біткен соң оларды алып тастап, тазалықты қамтамасыз ету – әр азаматтың міндеті. Бұл тек тазалық емес, біздің мәдениетіміздің деңгейін көрсетеді, – деді «Amanat» партиясы Алматы облыстық филиалының өкілі Әсем Елиманова.
Бастысы, тазалық акциясы Алматы облысымен шектелмей, еліміздің басқа өңірлерінде де жалғасып жатыр.
– Біз тек үгіт-насихат кезеңінде ғана белсенді болғымыз келмейді. Науқан аяқталған соң, артына қоқыс қалдырып кету – жат қылық. Сондықтан осы акция аясында елдің жауапкершілікті сезінуіне үлгі болғымыз келеді. Бұл – біздің елге, қоғамға және өз таңдауымызға деген құрметіміз. Қарапайым қадам болса да, оның маңызы зор, – деді «Жастар рухы» ЖҚ-ның белсендісі Медет Бекбергенов.
