АҚТӨБЕ. 16 маусым. Ақтөбедегі Тахауи Ахтанов атындағы облыстық драма театрында «Жастар жалыны-2015» жастар шығармашылық жобасының қорытынды гала-концерті өтті. Бұл туралы egemen.kz тілшісі хабарлады.
Мәдени іс-шараға арнайы қатысқан облыстық жастар саясаты мәселелері басқармасының басшысы Дариға Исмағамбетова биылғы «Жастар жалыны-2015» жобасының Елбасының «100 нақты қадам» Ұлт жоспары негізінде, Қазақстан халқы ассамблеясының және Қазақстан Республикасы Конституциясының 20 жылдығы, Қазақ хандығының 550 жылдығы, Ұлы Жеңістің 70 жылдығы аясында шығармашыл жастарды біріктіріп отырғанын жеткізді. Оның айтуынша, шығармашылық жоба аясында «Шексіз шығармашылық», «Түріміз басқа, тілегіміз бір», «Менің мамандығым – менің мақтанышым», «Намысты жастар», «Жастар арна», «Біз Ақтөбенің таланттарымыз» облыстық байқаулары, «Street workout» облыстық турнирі өткізілген.
Облыстағы талантты жастардың жаңа белестерді бағындыруға деген ынта-жігері ерекше. Жобаға 1000-ға жуық жас қатысты. Олардың шығармашылық тұрғыдан өркендеуіне барлық жағдай жасалуда. Дарынды жастарды анықтап, облыстың мәдени-қоғамдық өміріне белсене араласуына ықпал етуді көздейтін жобасы өз мақсатына толық жетті десек, артық айтқандық емес.
Гала концерт барысында облыстық жастар саясаты мәселелері басқарамасының басшысы Дариға Исмағамбетова жоба аясында өткен байқау жеңімпаздары мен жүлдегерлерін дипломдармен және бағалы сыйлықтармен марапаттады.
Сатыбалды Сәуірбай.
Дерек, сурет: egemen.kz.
