Жобаны ұйымдастырушылар Президент жанындағы Мемлекеттік басқару академиясының өңірлік филиалының қолдауымен 45 аптаның ішінде Абайдың 45 қарасөзін тұшынып оқып, бүгінгі адам, қазіргі қоғам мінезімен сабақтастыра талдауды көздеп отыр.
«Абайдың қарасөздері» челленджін бірінші болып бастап берген облыс әкімінің орынбасары Ринат Мұхаметқалиевтің айтуынша, офлайн және онлайн режімде жүріп жатқан талдау сабақтарына мемлекеттік қызметшілермен қатар көптеген мұғалім, студент жастар қызығушылық танытып отыр.
«Абай күнін» қалай өткізсек дұрыс болады деген ізденіспен жүрген едік. Демалыс күні велосипедпен келе жатып, ойыма осы идея сап ете қалды. Мұндай іс-шаралар бір күнмен шектеліп қалмауы керек. Ертеңінде Президент жанындағы Мемлекеттік басқару академиясының өңірлік филиалына хабарласып: «Абайдың қарасөздері» атты челлендж ұйымдастырайық деп едік. Оны өзім бастап бергім келеді. Сіздерде білік-білімін жетілдіріп жатқан мемлекеттік қызметшілер бар ма?», деп сұрадым. Ол кісілер қазір жиырма адам оқып жатқанын, бірінші дәрісті сол топқа оқуға болатынын айтты. Содан өзім жиі қайталап оқитын «Егер есті кісілердің қатарында болғың келсе, күнінде бір мәртебе, болмаса жұмасында бір, ең болмаса айында бір, өзіңнен өзің есеп ал!» деп келетін он бесінші қарасөзді таңдап алып, дайындала бастадым. Слайд жасап, білім басқармасынан өзіме керек мәліметтерді сұратып алдым. Үлкен жетістікке жеткен тұлғалар, олардың шыңдалу, өсу жолы, адамға өз мақсатына жетуіне кедергі келтіретін кесір әдеттер, одан арылудың амал-жолдары туралы ақпарат жинадым. Дәріс өзіме де, тыңдаушыға да ұнады. Қызықты ойлар айтылды, қызу пікірталас та болды. Одан кейін челлендж кезегін облыстық мәслихаттың депутаты Қырмызы Сапарқызына ұсындым. Осылайша, бұл жоба сәтті жалғасын тауып келе жатыр», дейді Ринат Зәкиұлы.
Қостанай облысы
