Сәкен театры сербтерге әйгілі жазушы-драматург Оралхан Бөкейдің «Атаукере» драмасын алып барды. Мұны сахналаған режиссер – Айдын Салбан.
Joakimfest XIX халықаралық фестивальдың қазылар алқасы театр әртістерінің шеберлігіне тамсанып, оны жоғары бағалап, «Үздік актерлік ансамбль» деген сыйлықпен марапаттады.
Жан-жақтан келген театрлардың өнеріне театр сыншысы, театртанушы, драматург Александр Милосавлевич (Сербия), театр режиссері және Белградтағы Өнер институтының драма өнері факультетінің оқытушысы Ивана Вуич (Сербия), актер және театртанушы Миролюб Миятович (Босния, Герцоговина) секілді өнер майталмандары баға берді.
– Басында жазушы-драматург Оралхан Бөкейдің терең философиялық ойға құрылған «Атаукере» шығармасы бойынша инсценировкасын режиссер Айдын Салбанның өзі жасаған қойылымымызды сербтер қалай түсінер екен деген қобалжудың болғаны рас. Дегенмен, сахнаның жоғарғы жақ маңдайында серб тіліне аударылған титр қатар беріліп отырғанда, залда шыбынның ызыңы естілердей тыныштық орнады. Екі сағат 10 минутқа жалғасқан спектакль аяқталғанша, ешкім орнынан қозғалған жоқ. Қойылым біткенде көрермендердің көңіл күйі олардың дүркіретіп қол соққандарынан айқын аңғарылды. Ұлттық музыкамыз, әсіресе домбыраның қоңыр үні мен әртістеріміздің ойыны қатты ұнағанын айтты сербиялық көрермендер, – дейді театрдың баспасөз қызметкері Сағат Батырханқызы.
Білуімізше, бұл театр фестивалінің Сербияда беделі зор. Оның негізі сонау XIX ғасырдың екінші ширегінде қаланған. Сербияға театр әкелген Йоаким Вуйчтың атымен аталған. Фестиваль бастау алғалы бері Крагуевац қаласына әлемнің 25 мемлекетінен театр ұжымдары келіп, 150-ге жуық қойылым қойыпты.
Қарағанды облысы
