Ал дайындығы жеткіліксіз, тәжірибесі аз адамға бұл сайыс оңайға соқпайды. Ежелгі заманнан келе жатқан бұл ойын жаугершілік кезінде найза ұстап, қылыш шабатын жауынгерге қажетті қасиеттерді қалыптастырған. Аударыспақ қазіргі үлкен жиын-тойларда, мерекелерде спорт ойынының бір түрі ретінде көрсетіліп жүр.
Сайысқа қатысушылар үш салмақтық санатқа бөлінеді. Аударыспаққа салмақ санатқа енгізудің мақсаты – қатысушыларға неғұрлым тең жағдай туғызу. Оны спорттың бір түріне айналдыру үшін бір-біріне тең келетін салмақтық санатты көбейткен дұрыс. Бұл санатқа бөлу кейінгі кезде қалыптасты. Ертеде кез келген тілек білдіруші өз еркімен қатыса беретін болған. Спорттың бұл түрінің дамуымен бірге, сөз жоқ, оның салмақтық санаты да көбейе, кеңейе беретіні күмәнсіз.
Ойында аты белді, жарамды, өзі мықты, атқа отырысы мығым, білекті жігіттер жеңіп шығады. Сайып келгенде, аударыспақта негізгі рөлді ат пен ойыншы жігіттер атқарады. Аттар үстіндегі адамның ыңғайына бейімделгіш, арнайы үйретілген болуы шарт. Оспадарлық, жұла қашу, салып қалу, қол қайыру сияқты айла-амалдарды қолдануға болмайды. Аударысу ат пен жігіттің үйлесімді қимыл-бірлестігіне сүйене отырып, күш-жігердің басымдығын көрсететін қалыпты, байсалды шеберлікке ұласып жатуы шарт.
