Сурет: ru.freepik.com
- Шайбалы хоккейден еліміздің әйелдер құрамасы Қытайдың бас шаһары Бейжіңде өткен Азия чемпионатын қола медальмен қорытындылады. Шешуші ойында бұрымдыларымыз Оңтүстік Кореямен шеберлік байқасты. Негізгі уақыт 4:4 есебімен аяқталды. Овертаймда да жеңімпаз анықталған жоқ. Ал буллит соғуда жерлестеріміздің жолы болды.
- Құрлықтық хоккей лигасының (ҚХЛ) ең үздік бапкерлерінің рейтингі жаңартылды. Астананың «Барысын» жаттықтыратын Ғалым Мәмбетәлиев 23 маманның арасында әзірге 18-орында. Көш басында – Игорь Никитин. Сөз орайы келгенде Ярославльдің «Локомотив» клубының тізгінін ұстаған 51 жастағы Никитин Өскеменнің тумасы екенін айта кеткен абзал. Спорттық мансабын жергілікті «Торпедода» бастаған ол бірер жыл еліміздің ұлттық командасы сапында өнер көрсетті.
- Канаданың Монреаль қаласында шорт-тректен World Tour турнирінің екінші кезеңі аяқталды. Өкінішке қарай, бұл жарыста бірде-бір жерлесіміз жеңіс тұғырына көтеріле алмады. Ең үздік нәтижеге Денис Никиша қол жеткізді. Ол В тобындағы 500 метрлік сайыста екінші орынды еншіледі.
- Төрт жыл бойы UFC-де өнер көрсеткен аралас жекпе-жек шебері Мария Агапова 16 қарашада АҚШ-тың Атлантик-сити қаласында кәсіпқой бокстан өзінің екінші кездесуін өткізеді. Ол жергілікті былғары қолғап шебері Стейша Саттлспен сайысқа түседі. Осыған дейін отандасымыз Германияның өкілі Николь Шефермен шеберлік байқасып, тең түскен еді.
- Футболдан Лига кубогінің финалы 23 қарашада Түркістанда өтеді. Аталған жарыстың бас жүлдесіне елордалық қос ұжым – «Астана» мен «Жеңіс» таласады. Кубок иегері 129 миллион теңге алса, финалда ұтылған команда 89 миллионды еншілейді.
- Ресейдің ВТБ лигасында өнер көрсететін «Астана» баскетбол клубы Екатеринбургте жергілікті «Уралмаштан» 62:72 есебімен ұтылды. Сөйтіп, елордалық клуб қатарынан 12 рет жеңілістің кермек дәмін татты.
- Сауд Арабиясының Эр-Рияд қаласында өтіп жатқан WTA-ның қорытынды турнирінде Елена Рыбакина сәтсіз өнер көрсетіп жатыр. «Күлгін» тобындағы отандасымыз тұсаукесер кездесуінде Жасмин Паолиниге (Италия) 6:7, 4:6 есебімен есе жіберсе, келесі бәсекеде Чжан Цинвэньге (Қытай) жол берді – 6:7, 6:3, 1:6. Енді ол соңғы турда Арина Соболенкомен (Беларусь) сайысқа түседі.
