Еліміздің түкпір-түкпірінен жиналған белді ұжымдар мен Қырғызстан, Әзербайжаннан келген әртістер жеті күн қатарынан жанын сала өнер көрсетті. Ал олардың қарым-қабілетін көзіқарақты көрерменмен бірге Әлия Бөпежанова, Жаныш Құлмамбетов (Қырғыз Республикасы), Амангелді Мұқан, Анар Еркебай сынды белгілі театр мамандары бағалады.
«Түркі дүниесі мен мәдени кеңістігінде де Роза Мұқанова туындыларының шоқтығы биік. «Мәңгілік бала бейне», «Сарра», «Бопай ханым» деп жалғасып кете беретін көркемдік деңгейі жоғары қойылымдардың барлығы да бүгінде рухани құндылығымызды дәріптейтін өміршең туындыларға айналды. Осы жолы жаңа есімдерді ашқымыз келді, әсіресе режиссураның аяқ алысына баға беруді мұрат тұттық. Көрерменге шынайы театр атмосферасын сыйлаған фестивальдың жемісті де табысты бір аптасы еліміздің мәдени кеңістігінде ерекше оқиғаға айналды деп ойлаймын», деді жоба ұйымдастырушысы, Музыкалық жас көрермен театрының директоры Асхат Маемиров.
Фестивальдың ашылу салтанаты алдында әртістер мен қатысушылар қызыл кілеммен жүріп өтті. Ал Мұхтар Әуезов атындағы Қазақ ұлттық драма театры әкелген режиссер Болат Атабаевтың жиырма жылдан бері сахнадан түспей келе жатқан «Мәңгілік бала бейне» спектаклі көпшіліктің қошеметіне бөленді. Жалпы, автордың да драматургияға сара жолы аталған қара шаңырақта театр кемеңгері марқұм Болат Атабаевтың ақ батасымен басталған болатын.
«Мен үшін жазу – мінәжат. Жазу ойды бұзбайды, жанды кірлетпейді. Жазу жалған сөйлетпейді. Осындай қасиет бар қаламда. Отызға да толмаған шағымда «Мәңгілік бала бейне» деген пьесамды қара шаңырақ Мұхтар Әуезов атындағы Қазақ драма театрының реформатор режиссері марқұм Болат Атабаев сахнаға шығарды. Ал ол уақытта М.Әуезов театрында тек қана классиктер қойылатын. Ұлылардың ұлағаты әрі жауапкершілік болар, сол сәттен бастап өмір бойы жазуға адал болуға ұмтылдым. Соның нәтижесінде еліміздің режиссерлері ғана емес, бауырлас қырғыз елі мен әзербайжандық суреткерлер де шығармашылығыма қызығушылық танытып, мерейтойыма тамаша қойылымдарын алып келіп қуантты», деді Роза Мұқанова.
Биылғы фестивальға қонақ ретінде қатысқан әкемтеатр ұжымынан басқа, Астана төрінде алыс-жақыннан келген А.Тоқпанов атындағы Жамбыл облыстық қазақ драма театры «Мәңгілік бала бейне», Қ.Қуанышбаев атындағы Қазақ ұлттық музыкалық драма театры «Бопай ханым», Астана қаласы әкімдігінің Қуыршақ театры «Мәңгілік бала бейне», С.Сейфуллин атындағы Қарағанды облыстық драма театры «Ешкім де кінәлі емес», Түркістан музыкалық драма театры «Фариза», Қырғыз Республикасы Бішкек қаласынан келген Жамал Сейдакматова атындағы «Тунгуч» жастар театры «Жесір» және әзербайжандық театр ұжымы «Шатыр астындағы Мен» қойылымдарын театр сыншылары мен көрермен сарабына ұсынды. Нәтижесінде, Түркістан музыкалық драма театрының режиссері Фархад Молдағали қойған «Фариза» драмасы «Үздік қойылым» деп танылды. «Үздік режиссура» аталымындағы жүлдені «Жесір» қойылымы үшін Жамал Сейдакматова атындағы «Тунгуч» жастар театрының режиссері Арнис Кыдырмышев еншілесе, «Үздік актерлік ансамбль» аталымындағы марапатты Астана қаласы әкімдігінің Музыкалық жас көрермен театры Абзалбек Максим режиссурасында ұсынылған «Қыз жылаған» драмасы үшін алды. «Үздік ер адам бейнесі» жүлдесі – «Шатыр астындағы Мен» спектакліндегі Анти Шрек рөлі үшін Әзербайжан Республикасы Газах мемлекеттік драма театрының актері Хазар Гянджалиға, «Үздік әйел бейнесі» аталымындағы сыйлық – «Бопай ханым» тарихи драмасындағы Бопай рөлі үшін Қ.Қуанышбаев атындағы Қазақ ұлттық музыкалық драма театрының актрисасы Лейло Бекназар мен C.Сейфуллин атындағы Қарағанды облыстық қазақ драма театрының «Ешкім де кінәлі емес» спектакліндегі Асыл рөлі үшін Дина Заитоваға табыс етілді. Сонымен қатар «Сахналық жаңа форма табудағы ізденістері үшін» «Мәңгілік бала бейне» спектаклімен (режиссері – Ә.Оспанбаева) А.Тоқпанов атындағы Жамбыл облыстық қазақ драма театры марапатталды. Ал «Екінші пландағы үздік ер адам бейнесі» жүлдесін Астана қаласы әкімдігінің Қуыршақ театры ұсынған «Мәңгілік бала бейне» спектакліндегі Депутат рөлі үшін Дархан Мүслимов, «Екінші пландағы үздік әйел бейнесі» аталымын Х.Бөкеева атындағы Батыс Қазақстан облыстық қазақ драма театрының «Қаралы сұлу» спектакліндегі Қызметші кемпір рөлі үшін Гүлжиян Шынтемір және Астана қаласы әкімдігі Қуыршақ театрының әртісі Айжан Садықова «Мәңгілік бала бейне» спектакліндегі Қатира рөлі үшін теңдей бөлісті.
«Фестивальдық қозғалыстар жалпы өнердің дамуына, бәсекелестік пен жаңа ізденістердің дамуына өте қатты әсер етеді. Осылайша, талай театр әртістері танылып, үлкен шығармалар дүниеге келеді», деді Әлия Бөпежанова.
Жеті күн бойы көрерменін жарқын әсерге бөлеген өнер думаны осылайша өз мәресіне жетті. Еліміздің түкпір-түкпіріндегі өнер ұжымдары мен бауырлас елдер театрларының басын бас қала төрінде қосқан тамаша театр думанының әсері ұзақ уақыт бойы көрермен жадында жатталары сөзсіз.
