Сурет: ru.freepik.com
- Белгілі кәсіпкер Ерлан Қожасбай жуырда ғана Албанияның астанасы – Тиранада олимпиадалық емес салмақ дәрежелері бойынша өткен әлем чемпионатында еркін күрестен 70 кг салмақта бас жүлдені олжалаған Нұрқожа Қайпановқа ZEEKR көлігін сыйға тартты.
- Ұзақ жылдар ауыр атлетикадан еліміз құрамасының бас бапкері болған Алексей Ни ғұмыр бойы үлкен спорттан шеттетілді. Сол маманның басшылығымен бірқатар отандық зілтемірші Олимпия ойындарында алтын медальды иеленген еді. Бірақ кейіннен олардың допинг қолданғаны анықталып, барлығы да өз атақтарынан айырылды.
- Биыл футболдан ел біріншілігінде көш соңында қалып қойған Қарағандының «Шахтері» өз тарихында алғаш рет премьер-лигада ойнау құқығынан айырылды. Соған наразы болған облыс әкімі Ермағанбет Бөлекпаев жаттықтырушылар құрамын толықтай өзгертті. Енді кеншілер қаласында жасақталған команданы кезінде Лондонның «Челсиі» мен Мәскеудің «Спартагында» ойнаған чехиялық маман Иржи Ярошик баптайды. Сондай-ақ алдағы уақытта Қарағандыда УЕФА-ның стандартына сай жаңа стадион салу жоспарланып отыр.
- Дарынды үстел теннисшісі Жәния Бекмұхамбетова Мажарстанның Сомбатхей қаласында өткен халықаралық турнирде екі жүлде жеңіп алды. Алғашында ол 13 жасқа дейінгі ойыншылар арасында тек тайпейлік Ли Джэн-Юэге есе жіберіп, қола медальды иеленсе, іле-шала 11 жастағылардың жарысында бақ сынады. Бұл додада қазақ қызы қарсылас шыдатпады. Мажарстандық Сара Сонди (3:0), испаниялық Лора Уриа (3:0), украиналық Александра Бец (3:0), испаниялық Джулия Фернандес (3:1), Кармен Гомес (3:0), румыниялық Бьянка Томадан (3:0) басым түскен Жәния бас жүлдені олжалады.
- Ертең Швейцарияның Берн қаласында семсерлесуден Әлем кубогінің кезеңдік сайысының шымылдығы түріледі. Бұл жарыста Елмир Әлімжанов, Александр Федотов, Ерлік Сертай, Алексей Касаткин, Руслан Құрбанов, Вадим Шарлаимов, Богдан Лукин, Кирилл Павлов, Георгий Тинников, Никита Жулинский өнер көрсетеді. Ал құрамында Владислава Андреева, Ләззат Қарыпова, Каролина, Кристина Фомина, Виктория Қайдарова, София Николайчук, Наталья Зинякова сынды бұрымдылары бар еліміздің әйелдер құрамасы БАӘ-нің Фуджейрасында өнер көрсетеді.
- Кеше Ресейдің Санкт-Петербург қаласында шайбалы хоккейден «Болашақ кубогі» басталды. 10 қарашаға дейін созылатын турнирде еліміздің жастар құрамасы Беларусь командасы және айдын иелерімен шеберлік байқасады.
- Ресейдің АСА лигасында күш сынасып жүрген жартылай орта салмақтағы Артем Резников өзінің келесі жекпе-жегін 15 желтоқсанда Мәскеуде өткізеді. «Спартак» деген жанама есімді таңдаған отандасымыз шешен спортшысы Юсуф Раисовпен айқасады.
