Әсіресе сын мен сықаққа, әзіл мен әжуаға толы «Қызығы мол сол жылдар» атты бірінші бөлімі оқымасыңа қоймайтын сынды. «Беташардың бес сомы» деген тақырыптың өзі менмұндалап тұрған жоқ па?
Екінші, үшінші бөлімдері – «Егемендіктің алғашқы лебі» һәм «Өмірдің өз бейнесі» аталыпты. Бұл жөнінен келгенде, кітап туралы жазған авторлардың пікірі назар аудартады. «Мына кітапқа жазылған мақалалардың бір бөлігі өткен ғасырдың сонау тоқсаныншы жалдарының басында жазылып, қазір тарих төрінде қалған «Өркен» апталығында жарияланғанымен, құндылығы әлі жоғалмағанына таңғаламыз. Сол сияқты, енді ғана «Егемен Қазақстан» атанған газетте көтерген тақырыптары ширек ғасырдан соң да жұртшылықты толғандырады екен. Мұны әсіресе, Байқоңыр ғарыш айлағына қатысты мақалаларынан байқадық. Байқоңырға барып, бұл күрделі кешенмен егжей-тегжейлі танысып, ішек қырындысын ақтаруға қабілеті жеткендер бірен-саран» депті қаламгер Қайнар Олжай.
Мақалалар жинағының төртінші һәм бесінші бөлімдері «Игі іспен із салғандар» және «Курстастар келбеті» деп айдарланыпты. Құрғақ, қара мақалалар емес, кітаптың көтерген жүгі материалдардың тақырыбынан-ақ көрінеді. Оқырман олжасына айналар деген ойдамыз.
