Автор атап айтқандай, кітапқа «бүгінгі мектеп оқушыларының аталары мен әжелері балалық шақтарында бастан кешкен» оқиғалары арқау болған. Осынау белгілі бір тарихи кезеңде өмір сүрген балауса шәкірттердің қызықты әлемін елестететін туындылар топтамасы жас ұланның оқудағы, қоғамдық пайдалы еңбектердегі іс-әрекеттері, ізденістері, өзара достық қарым-қатынастары жайынан сыр шертеді.
Мәселен, «Біз табысар қиырлар» хикаяты адамгершілік, азаматтық көзқарастары түрліше қалыптасып келе жатқан сыныптастардың пікір қайшылығы барысында өзара қақтығысып қалуы мен түсінісіп, татуласуы жөнінде тартымды да тағылымды мысалды алға тартады. Әртүрлі тұрпаттағы сыныптастар мінез-құлқын арқау еткен «Менің досым» әңгімесі де оқырманын бей-жай қалдырмайды. Балалардың алғашқы сезімдерін суреттеген өзге туындылары да («Кемпірқосақ – көк аспан», «Ерке», т.б.) сүйсіне оқисыз. Ал «Бетбұрыс», «Тәжірибе, қоян және біз» хикаяттары балалардың оқуды сабақтан тыс жұмыстағы ғылымилыққа пара-пар ізденістерімен қалай ұштастырғанын, сол реттегі қарым-қатынастарын көрсетеді.
Жинақтағы екі хикаят оқырманды оқушылардың ғылыми-техникалық фантастика көкжиегінде самғаған қиялдарымен таныстырады. Бірінде («Батыр-Болат пен Гүл-Жауһар») оқу озаттары космос лифтімен көкке көтеріліп, ғарыштағы демалыс лагерінде шым-шытырық оқиғаларды бастан кешсе, келесіде («Ғарышқа жаяу саяхат») тау ішіндегі лагерьде тынығып жүрген оқушылар өзге ғаламшардан келген кемеге кезігеді, түр-тұрпаты өздеріндей, бірақ таңырқарлық қасиетке ие ғарышкер баламен танысады...
Сондай-ақ «Сенім», «Сыныптастар», «Армандастар» атты хикаяттарда ауыл мен қала мектептерінде оқитын жеткіншек, жасөспірім шәкірттердің арман-қиялдары, әлемді ересектерше тануға тырысулары, болашаққа өздерінше жоспар құрулары жөнінде әңгімеленеді.
Балжан ХАБДИНА,
баспа және полиграфия ісінің қайраткері
