Көрме «Пленэр» деп аталады. Кескіндеме өнерінде бұл сөз «суретшінің табиғат аясында, ашық аспан астында жұмыс істеуі» дегенді білдіреді екен.
Іс-шараны ұйымдастырушылардың айтуынша, тамыз айында өткен «Плэнер – 2024» жобасы аясында бір топ кәсіби суретші Наурызым қорығына арнайы барып, бірер күн тұмса табиғат аясында жұмыс істеген. Аталған көрмеде осы сапарда салынған табиғат суреттері көпшілік назарына ұсынылды. Экспозиция залына қойылған көркемсурет туындыларында Қостанай өңірінің інжу-маржаны саналатын Наурызым қорығының орман-даласы, өзен-су, қарағай-қайыңы, қорықта тіршілік ететін жан-жануарлар мен құстар әлемі көрініс тапқан.
Жылда қыркүйек айы жақындағанда өтетін дәстүрлі іс-шараға қатысқан қылқалам шеберлерінің бірі – Суретшілер одағы облыстық филиалының төрағасы, кескіндемеші Вадим Быков.
«Биылғы пленэр ерекше есте қалды. Табиғат аясында өндіртіп жұмыс істедік. Бір қызығы, біз қорыққа кіре салысымен жол бойы түнеріп тұрған аспан шайдай ашылып, күн райы бірден жадырап сала берді. Біз кеткенше күн жылы, ауа райы сурет салуға қолайлы болды. Наурызым қорығының ғажайып табиғатын мейлінше жан-жақты қамтып, бояу тілінде сөйлетуге тырыстық», дейді кескіндемеші.
Қостанай облысы
