Бұған дейін тракторды Ресейден бүтіндей бөлшек түрінде әкеліп, оны тек құрастырумен ғана шектеліп келген кәсіпорын кейінгі бір-екі жыл ішінде «Кировецке» қажет пластик бөлшектерді түгелдей Қостанайда өндіре бастады. Зауыт қуатты тракторға қажет 90 мыңнан аса бөлшекті өзі шығарады.
«Санкт-Петербург трактор зауытымен бірлескен кәсіпорын 2019 жылы іске қосылды. Бүгінде біздің кәсіпорын отандық нарықта аса танымал, ең бастысы, ірі бөлшекті құрастырудан ұсақ торапты құрастыру өндірісіне көше бастадық. Өндіріске бұрын-соңды болмаған озық технологиялар мен құзыреттерді енгіздік, әлі де енгізіп жатырмыз. Пластиктен жасалатын компоненттер өндірісін іске қосу оңай болған жоқ. Зауыт мамандары Санкт-Петербургте оқып келді. Нәтижесінде, қазір трактордың алдыңғы және артқы доңғалақтарының жабын қанаттарын, аккуммулятор батареясының қаптамасын, кабинаның төбесін және капотты өзіміз жасаймыз. Әсіресе, капот жасау аса қиын. Ол үшін пішіні әртүрлі 19 қосымша деталь жасап шығару керек. Мәселен, бір ғана капотты жасап шығару үшін пішіні, көлемі әртүрлі қосымша 19 бөлшек шығарамыз. Жалпы, бір тракторды шығару үшін оған қажет шамамен 90 жиынтық шығарамыз. Оның жалпы салмағы 1000 кг-дан асып кетеді. Бір ауысымда осындай 360, ал бір маусымда 27 мың жиынтық жасаймыз. Сондай-ақ трактордың тепе-теңдігін сақтап тұратын қосалқы бөлшекті де ауыр металдан өзіміз үйлестіреміз. Өндіріс барысында біз өзімізден техника сатып алып жатқан шаруалардың да тілегін ескереміз. Осы маусымда шыққан тракторларға «Weichai» қозғалтқыштары орнатылғанын да айта кету керек», дейді зауыт басшысы Динара Шүкіжанова.
Кәсіпорын басшысының айтуынша, Қостанай трактор зауыты бүгінге дейін өндірісті дамытуға серпін беретін біраз шаруа тындырған. Бүгінде өндірісті өрістетуге қажет заманауи құрылғылар, сенімді серіктестер бар. Қазір кәсіпорын қуаты 300 және 420 ат күшіне тең «Кировец» тракторларын шығарып жатыр. Тракторларды әлі де жаңарта түсу жоспарланып отыр. Мәселен, алдағы уақытта К-7М тракторларындағы жаңа гидрожүйені біріздендіру жоспарланып отыр. Нәтижесінде, қуатты техника қашықтан басқару жүйесімен жабдықталады. Бұл техниканың тұрған жерін, оның жылдамдығын, отын шығынын, қозғалтқыштың жай-күйін онлайн режімде бақылауға мүмкіндік береді.
Қостанай трактор зауытының дилерлері бүгінде Астана қаласы мен еліміздің 14 өңіріне қызмет көрсетеді. Кейінгі жылдары отандық нарықта ең көп сатылып жатқан ауылшаруашылық техникасының бірі де осы «Кировец» тракторы. Қостанай зауыты іске қосылған соң, ауыл шаруашылығына таптырмайтын қуатты техниканың сатылымы екі жарым есе өскен.
«Елімізде жер игеріп, дән егіп отырған ірі шаруашылықтар өте көп. Сондықтан Қостанай трактор зауыты секілді ауылшаруашылық жұмыстарына пайдаланылатын қуаты жоғары техника шығаратын кәсіпорындардың болуы аса маңызды. Біз осыдан көп жыл бұрын шаруашылықта сынап көрейік деген мақсатпен бір «Кировец» тракторын сатып алғанбыз. Үмітіміз ақталды. Қазір алқаптағы негізгі жұмыстың бәрін осы трактор атқарады. Бүгінде біздің шаруашылықта 71 «Кировец» тракторы бар», дейді Қарасу ауданындағы «Макс» жауапкершілігі шектеулі серіктестігінің басшысы Максим Артемук.
Қазір Қостанай трактор зауыты қуаты 350-ден 460 ат күшіне тең «Кировец» тракторларының К-735, К-739, К-742, К-743, К-746 тәрізді үлгілерін шығарады.
Бүгінде сауда-экономика саласында жүзден астам елмен іскерлік ынтымақтастық орнатқан Қостанай облысының ең ірі әріптестерінің бірі – Ресей Федерациясы. Батыс-Сібір жазығын жарып өтетін Тобыл өзенінің қос аңғарында жатқан көршілес аймақтардың арасындағы тауар айналымының жылдық көлемі 2 млрд долларды құрайды.
Қостанай облысы
