Сурет: semeytany.kz
Аталған министрлік ерекше білім беру қажеттіліктері бар балаларға тең мүмкіндікті қамтамасыз ету, мектептерде инклюзивті білім беру ортасын құру бағытында бірқатар жұмысты қолға алған. Осы қадамның бірі – педагог-ассистент мамандарын даярлау.
Қазіргі таңда психологиялық-медициналық-педагогикалық кеңес беру есебінде (ПМПК) ерекше білім беруді қажет ететін 203 мың бала бар. Олар 496 арнайы білім беру ұйымында оқиды. Білім беру ұйымдарында инклюзивті орта қалыптастыру мақсатында айтарлықтай жұмыс жүргізілді. Мәселен, ерекше білім беру қажеттіліктері бар балалар үшін балабақшалардың 69%-да, мектептердің 88%-да және колледждердің 80%-да жағдай жасалған. Мектептерде 1 071 арнайы жасақталған кабинет жұмыс істейді.
«Еліміздің мектептерінде «педагог-ассистент» лауазымы енгізіліп, мамандар саны бір жылда 1 000-нан 2,5 мыңға дейін артты. Енді педагог-ассистент лауазымын мектепке дейінгі ұйымдарда енгізу мүмкіндігі қарастырылып отыр. Ерекше білім беру қажеттіліктері бар балалармен 9 мыңнан астам арнайы педагог жұмыс істейді. Мамандарға деген қажеттілікті ескере отырып, келесі оқу жылынан бастап, еліміздің колледждерінде «педагог-ассистенттер» даярлау қолға алынады», дейді Инклюзивті және арнайы білім беру департаментінің директоры Лаура Бұтабаева.
Оқу-ағарту министрлігі ерекше білім беру қажеттіліктері бар балаларға білім алу жағдайын жақсарту және білікті кадрлармен қамтамасыз ету бағытындағы жұмыстарды әлі де жалғастыра бермек.
