ІІМ-нің әйелдерді зорлық-зомбылықтан қорғау жөніндегі бөлімшелері биыл 16 мың заң бұзушылықтың жолын кесті. Сондай-ақ кикілжің шығарған 91 мың азамат әкімшілік жауапкершілікке тартылып, оның ішінде 24 мыңы қамауға алынған. Бұл өткен жылмен салыстырғанда 2,5 есе жоғары.
– Президент ана мен бала мүддесін қорғау мәселелеріне ерекше назар аударады. Бұл – мемлекеттің стратегиялық міндеті. Биыл Ұлттық комиссия «Заң мен тәртіп» қағидатын қатаң сақтауды қамтамасыз ету бағытына басымдық береді. Әйелдер мен балаларға қатысты қылмыстарды тергеу жүйесін жетілдіру мәселесі – ұлттық комиссияның тұрақты бақылауында. Біздің міндетіміз – тергеуші әйелдердің әлеуетін пайдалана отырып, әйелдер мен балалардың қауіпсіздігін қамтамасыз ету туралы заңның орындалуын бақылау және оны толық қамтамасыз ету, – деді Ұлттық комиссия төрағасы Аида Балаева.
Әйелдер мен кәмелетке толмағандарға қатысты зорлық-зомбылық қылмыстарын тергеумен 261 әйел-тергеуші айналысады. Құрылған мобильді топтар мекенжайы бойынша 33 мыңнан аса отбасын қарап, көмекке мұқтаж 1 мыңнан аса отбасын анықтады.
Топтардың тиімді жұмыс істеуі үшін қызметтің ұйымдастырушылық негіздері, оның ішінде әйел тергеушілердің осы қылмыстық істерді айрықша тергеуі туралы талаптары айқындалған қағидалар әзірленіп, бекітілді.
Ұлттық комиссия «Самұрық-Қазынамен» бірлесе «Бір қадам» «One-Stop-Service» қанатқақты жобасына бастамашылық жасады. Жобаны Айман Омарова басқарады. Бастама аясында биыл 46-дан аса қылмыстық іс қаралған. Басым көпшілігі балаларға қатысты жыныстық зорлық-зомбылыққа қатысты. Өтініш білдірген 669 әйелдер мен балалар шұғыл құқықтық, психологиялық және сараптамалық көмек алды.
Жалпы, жоба шеңберінде кәмелетке толмағандарды жәбірлеу, қудалау, қорқыту, түрмедегі зорлық-зомбылық, тұрмыстық зорлық-зомбылық салдарынан болған кісі өлімі фактілеріне қатысты қылмыстық істер қозғалған.
Ұлттық комиссия әйелдер мен балалардың құқықтарын қорғау саласындағы құқық қолдану практикасын қадағалауды жалғастырады. Бұл жұмыстың тиімділігі құқық қорғау органдарының, қоғамдық ұйымдардың және азаматтардың жұмылуы арқылы нәтижелі болмақ.
Отырыс қорытындысы бойынша комиссия төрағасы А.Балаева мемлекеттік органдарға бірқатар тапсырма берді.
