2014 жылы С.Аманжолов атындағы университетте құрылған «Шабыт» студенттер театрынан бүгінде жеті буын, 150-ге жуық түлек ұшыпты. Осы уақыт ішінде театрдың жеткен жетістігі, қойған қойылымы аз емес. Олардың қатарында «Желтоқсан желі», «Менің өмірім», «Махаббат мұңы», «Табамын сені», «Ар айнасы» секілді туындылар бар. Ал «Ай мен Айша», «Қыз жиырмаға толғанда», «Нарком Жүргенов», «Бармысың махаббат» және «Репортаж» атты қойылымдар да театр репертуарында ерекше орын алады.
– Осы уақытқа дейін қаншама жас таланттармен жұмыс істедім? Әрбіреуінің орны ерекше. Театр құрыла сала мақсатты түрде жұмыс істедік. Студенттік шақтың қызықты сәттерін сахналадық. Сөйте жүріп, көрерменге ой салуға тырыстық. Бүгінгі қойылым да көпшіліктің ойынан шығары сөзсіз, – деді «Шабыт» театрының жетекшісі Ертай Хасенов.
Мақсатты түрде жұмыс істеген театр ұжымы Мәскеу қаласындағы «Третий звонок» атты V халықаралық театральді фестивалінде II дәрежелі дипломмен марапатталған. Республикалық байқауларда да тұғырдан түспеген. Қайбір жылдары Дидахмет Әшімханның «Көк перінің кердеңі» қойылымын қойып, ІІ орын алған. Сондай-ақ облыс көлемінде өтетін мәдени, әдеби кештерде «Шабыт» театрының студенттері ортадан табылып жатады.
Бүгінгі «Ақ келін» қойылымында екі жас бір-бірін сүйіп қалғанымен, ата-анасы қарсы болған. Кейіннен жастар қулыққа басады. Күлпаштың ұлы біреудің ерке-шолжаң қызын келін қылып түсірмек болады. Оның үстіне ол орыс тілді болып шығады. Ішімдікке де жоқ емес. Мұны көрген анасы ат-тонын ала қашып, әуелгі қызың тәуір екен деп, райынан қайтқан. Сөйтіп екі жас қосылып, ұлан-асыр той жасайды. Сахнадағы тойдың атмосферасы көрерменге де сезіліп тұрады.
Қойылымнан соң театр ұжымын университет, кітапхана, музей ұжымдары құттықтап, сый-сыяпаттарын жасады.
ӨСКЕМЕН
