Палата спикері өз сөзінде форумға қатысушыларға ілтипат білдіріп, Қазақстан үшін ғылымды және ғылымға негізделген экономиканы дамыту стратегиялық маңызға ие екенін айтты. Жалпы, Мемлекет басшысы Қасым-Жомарт Тоқаев жас ғалымдарды жүйелі қолдауға және отандық ғылымның әлеуетін арттыруға әрдайым баса мән беріп келеді.
М.Әшімбаев бұл бағытта жас ғалымдарға өз әлеуеттерін іске асыруға үлкен қолдау көрсетіп отырған альянстың жұмысына назар аударды. Сондай-ақ ол бірлестік отандық зерттеушілердің ғылыми-зерттеу жобаларына бағыт-бағдар беріп, оларды дәріптеуге үлкен үлес қосып келе жатқанын атап өтті және осы бағытта атқарылған жұмыс пен қол жеткізілген жетістіктерге назар аударды.
«Әділетті Қазақстанда ғылым, инновация және жаңа технология елдің орнықты дамуының негізі ретінде қарастырылады. Президентіміз Қасым-Жомарт Тоқаевтың бастамасымен Ғылым және технологиялар жөніндегі ұлттық кеңестің құрылуы – соның жарқын көрінісі. Кеңес ғылыми және технологиялық даму саласында тиімді, стратегиялық маңызды шешімдер қабылдауды қамтамасыз етеді. Ұлттық ғылым академиясының институционалдық рөлі де айтарлықтай нығайды. Алдағы уақытта бұл институт ғылыми қоғамдастық табан тірейтін маңызды негізге айналуға тиіс. Кейінгі 4 жылда Қазақстанда ғылымды қаржыландыру үш еседен аса өсіп, 80 млрд теңгеден 250 млрд теңгеге жетті», деп М.Әшімбаев осы салада Парламент Сенаты жүзеге асырған заңнамалық реформаларға тоқталып өтті.
Сенат төрағасы атап өткендей, ғылым ұлттық стратегиялық мақсаттармен және бәсекелестік артықшылықтармен тығыз интеграцияланып, үндесуге тиіс. Палата спикері өз сөзінде Парламент пен ғылыми қоғамдастықтың алдағы бірлескен жұмысының негізгі бағыттарын да тілге тиек етті.
«Еліміздің азық-түлік қауіпсіздігін қамтамасыз ету үшін, ең алдымен, аграрлық ғылымды дамытудың маңызы зор. Сондай-ақ табиғи байлығымызды сақтауға және оны тиімді пайдалануға мүмкіндік беретін терең зерттеулер, инновациялық тәсілдер және технологиялар қажет. Химия, мұнай-газ химиясы, ғарыш ғылымы сияқты салаларды дамыту да стратегиялық мәнге ие. Тұрақты өсуге қол жеткізу үшін атом энергетикасының дамуы және жаңартылатын энергия көздерін пайдаланудың жаңа тәсілдері маңызды рөл атқарады. Осы саладағы басым бағыттардың тағы бірі – жасанды интеллект. Ғылым экономиканың тұрақты және серпінді дамуын синхронды түрде қамтамасыз ете отырып, елдің стратегиялық мақсаттарын іске асыруға ықпал етуге тиіс», деді палата төрағасы.
Сонымен қатар форум барысында ғалымдар мен сарапшылар ғылым саласындағы өзекті мәселелер мен проблемаларды кеңінен талқылап, сындарлы диалог құрды. Соның нәтижесінде елдің әлеуметтік-экономикалық дамуы аясындағы ортақ міндеттер айқындалды.
