Қала әкімдігінің бастамасымен акция басталған күннен «Алматы – ортақ үйіміз» науқаны қызу қолға алынды. Қалалық инфрақұрылымға ұқыпты қарау, халық арасында азаматтық жауапкершілікті насихаттау, тұрғындарды экологиялық мәдениетке тәрбиелеу мақсатында ұйымдастырылған акция барысында қаланың барлық ауданында түрлі экологиялық іс-шаралар кеңінен өріс алды. Аудандық әкімдіктер мен коммуналдық қызметтер көшелерді, үйішілік аумақтарды, балалар мен спорт алаңдарын ретке келтірді. Жасыл аймақтарды – саябақтар, өзен-көлдер аумақтарын тазалауға ерекше мән берілді. Сондай-ақ мәдениет нысандарын, тарихи орындар мен ғимараттарды жинау, қалпына келтіру жұмыстары ұйымдастырылды. Коммуналдық қызмет қызметкерлері арасында түрлі номинациялар бойынша конкурс өткізілді.
«Алматы – ортақ үйіміз» науқаны аясындағы қалалық сенбілік комьюнити-орталықтарын да қамтыды. Жастар жыл бойы экологиялық ахуалды жақсартуды көздейтін бастамаларға тұрақты түрде қатысты. Қалалық жастар саясаты басқармасының мәліметінше, 2024 жылдың басынан бері бұл орталықтарда 1500-ден астам іс-шара, оның ішінде дәрістер, семинарлар, эко-акциялар, интеллектуалдық ойындар, шеберлік сабақтары, акустикалық кештер, спорттық турнирлер өткен. Шараларға 375 мыңнан астам адам қатысқан, оның 27 мыңы – NEET санатындағы жастар.
Биылдан бастап әрбір комьюнити-орталықта елімізде жасалған фандоматтар, пластикалық бөтелкелер мен алюминий банкаларды жинау аппараттары орнатылды. «Plastic reboot» акциясы аясында комьюнити-орталықтар 1 тонна пластик қақпақ жинаған. Экологиялық акцияларды ұйымдастыруға мұрындық болып жүрген мекемелер Бауман тоғайын да тазалады. Бір сөзбен, қалалық коммуналдық қызмет саласы Алматыны қысқы маусымға дайындау жұмыстарын сәтті аяқтады.
Қыста қала тазалығын қамтамасыз етуге 841 арнайы техника мен 1 400 жұмысшы жұмылдырылады. Жұмыс тиімділігін арттыру мақсатында «Алматы Тазалық» коммуналдық кәсіпорнының автопаркі 32 заманауи техникамен толықты. Санитарлық тазалық 2 318 көшені, жалпы ауданы 25,1 млн шаршы метр аумақты, ұзындығы 2 777 км болатын жолдарды қамтиды. Көше, жол желісін тазарту жұмыстарына 10 мердігер ұйым жауапты.
АЛМАТЫ
