Отандық өнімді нақты қолдау

Үкімет мүшелері аймақтарды аралап жүр. Мақсат – отандық бизнесті қолдау, өзіміз өндірген өнімді демеу. Мына қиын кезеңде мемлекет кәсіпкерлерге жан-жақты қолдау көрсетпек. Бұл жұмыс орындарының жабылып, адамдардың жұмыссыз қалмауы үшін жасалып жатқан нақты қадам. Сондықтан ұлттық компаниялар жергілікті кәсіпкерлермен меморандумға отырып, бір-біріне септесіп жұмыс істемек. Кеше Премьер-Ми­нис­тр­дің бірінші орынбасары Ба­қыт­­жан Сағынтаев жұмыс са­па­ры­­мен Қызылорда облы­сын­да болды. Алдымен облыс әкімдігінде орналасқан ситуациялық орта­лықтың жұмысымен таныс­ты. Мұнан соң бірінші вице-пре­мьер орталық мемлекеттік ор­гандар, ұлттық компания­лар басшыларының және бизнес қауымдастық өкілдерінің қатысуымен отандық тауар өн­ді­рушілерді қолдау мәселелері бойынша кеңес өткізді. Қазіргі дағдарыс кезінде маңызды міндеттердің бірі шетел­дік инвестицияларды тарту. Елбасы «Нұрлы Жол» – бола­шаққа бастар жол» атты биылғы Жолдауында шетелдік қаржы ұйымдарымен тығыз қарым-қатынаста жұмыс істеуді тапсырды. Осы орайда Еуропа қайта құру және даму банкімен жалпы құны 63 миллиард теңге болатын 8 жобаға қол қойған Қызылорда облысының тәжірибесі басқа аймақтарға үлгі боларлықтай, деп атап өтті Б.Сағынтаев. – Әлемдік нарыққа шығу үшін бәсекеге қабілетті өнім шығару керек. Мемлекет жан-жақты қолдау көрсететін болады, дегенмен сіздер де сапалы өнім өндіріп, бәсекеге төтеп бере алуларыңыз шарт, – деді бірінші вице-премьер. Кеңес қорытындысы бойынша Қызылорда облысы әкімдігі, ұлттық компаниялар мен жергілікті тауар өндірушілер арасында жалпы құны 39 миллиард теңге болатын бірқатар меморандумдарға отырды. Келісімге «Қаз­Атом­Пром», «ҚазМұнайГаз» және «Қазақтелеком» акционерлік қоғамдары қол қойды. Сондай-ақ, Қызылорда облы­­сы­ның әкімдігі мен жүйе құ­райтын кәсіп­орындар жұмыс орындарын сақтау және өндірістік үдерістерді тұ­рақ­тандыру бойынша меморан­думдар жасасты. Үшжақты келісімге Қызылорда облысы әкімдігі, облыстық кәсіподақ және «Петро Қазақстан Құмкөл Ресорсиз» АҚ, «ҚазГерМұнай» ЖШС, «Аралтұз» АҚ, «Абзал және К» ЖШС, «Жанрос Дриллинг», «Сибу» жауапкершілігі шектеулі серіктестіктері қол қойды. Бұдан кейін, Премьер-Ми­нистрдің бірінші орынбасары ма­ман­дан­дырылған халыққа қызмет көрсету орталығында болды. Ержан БАЙТІЛЕС, «Егемен Қазақстан». ҚЫЗЫЛОРДА.