Отырысты ашқан Сенат төрағасы, алдымен, палатаның және жеке өз атынан Маңғыстау облысында болған ұшақ апатынан қаза тапқандардың отбасылары мен жақындарына көңіл айтты. Мәулен Әшімбаев төтенше жағдайға байланысты Мемлекет басшысы Қасым-Жомарт Тоқаевтың тапсырмасымен мемлекеттік комиссия құрылып, құтқару операциясы аясында жедел қажетті шаралар қабылданғанын, сондай-ақ зардап шеккендерге тиісті көмек көрсетіліп жатқанын тілге тиек етті.
Сенат отырысында депутаттар «Қазақстан Республикасының кейбір заңнамалық актілеріне мемлекеттік қызмет мәселелері бойынша өзгерістер мен толықтырулар енгізу туралы» заңды қарап, мақұлдады. Талқылау кезінде айтылғандай, заң тәртіптік, әкімшілік және қылмыстық жауапкершілік шараларынан туындайтын мемлекеттік қызметке кіруді шектеу мерзімдерін, олардың салдарларының мөлшерлестігін айқындау, сондай-ақ құқық қорғау органдары мен Қарулы Күштердегі басшы лауазымдарды іріктеуді жетілдіру, оларды жасақтау сапасын арттыру, арнаулы, әскери атағын немесе жоғары басшы құрам мен басқаларының сыныптық шенін төмендету түрінде тәртіптік жаза қолдану тәртібін реттеуді және тағы басқа ережелерді айқындайды.
Сонымен қатар депутаттар «Қазақстан Республикасының Әкімшілік құқық бұзушылық туралы кодексіне өзгерістер мен толықтырулар енгізу туралы» заңды екі оқылымда қарап, мақұлдады. Заң нормаларына сәйкес «қоғамдық жұмыстар» түріндегі әкімшілік жаза енгізіледі. Сондай-ақ құжат әкімшілік құқық бұзушылық туралы істерді қарауға және әкімшілік жаза қолдануға құқығы бар лауазымды адамдар шеңберін кеңейтуді көздейді. Іс қысқартылған іс жүргізу тәртібімен жүзеге асырылатын жағдайларда жаңадан ашылған мән-жайлар бойынша істерді қайта қарау тәртібі де айқындалған. Жалпы, заң азаматтардың құқықтары мен бостандықтарын қорғауды қамтамасыз етуге, әкімшілік-деликтілік заңнаманы жетілдіруге және оңтайландыруға, сондай-ақ құқық қолдану тәжірибесінде анықталған құқықтық олқылықтар мен қайшылықтарды жоюға мүмкіндік береді.
Палата отырысында сенаторлар өздерінің депутаттық сауалдарын да жолдады. Андрей Лукин шекаралық өткізу бекеттеріндегі инфрақұрылымдық мәселелерге назар аударды. Сенатор осы бағытта бірқатар шешім ұсынды. Оның ішінде жүк көлігі үшін сервистік күту аймақтарын құру, шекара маңындағы теміржол стансаларын жаңарту сияқты шаралар бар.
«Жүк көліктерінің жүргізушілер демалатын, КЖО мен жанармай құю стансалары қызметін пайдалана алатын күту аймақтарын салу аса маңызды. Сондай-ақ өткізу және шекара бекеттерін қайта жаңарту жұмыстарын жеделдету үшін Үкімет жеке қаулы қабылдауы қажет. Оған қоса «ҚТЖ» АҚ-мен бірлесе отырып, шекаралық аудандардағы теміржол стансаларының инфрақұрылымын жаңғыртуды бастау керек. Сонымен қатар барлық шекара заставасының құрылысын аяқтап, шекарашылар тұратын мекенжайды жақсарту мен шекаралық бақылау бөлімшелеріндегі қызметкерлер санын көбейту қажет. Қазіргі заманғы өткізу бекеттері еліміздің көлік-логистикалық жүйесінің ажырамас бөлігіне айналуға тиіс және шекарадағы бақылауға қатысушылардың бәріне қауіпсіздік пен ыңғайлылық қамтамасыз етілуі керек», деді депутат.
Сенатор Ғалиасқар Сарыбаев ғарыш саласының негізгі мәселелеріне тоқталды. Депутаттың айтуынша, «Бәйтерек» жобасын іске асыруға ерекше көңіл бөлген жөн. Басты проблемалардың бірі «Союз-5» экологиялық таза зымыран тасығышын ұшыруға байланысты «Бәйтерек» жобасын іске асырудың кешігуі болып отыр. Жоба қайта жаңартылған, мемлекеттік бюджеттен қаржы қаралған, бірақ Байқоңырға зымыран жеткізу мерзімі 2025 жылдың соңына ауыстырылды. Сенатор мерзімнің ауысуы 2025 жылғы желтоқсанға жоспарланған алғашқы ұшу сынағын өткізуге қауіп төндіретінін жеткізді.
«2029 жылы «KazSat-3» спутнигін кең ауқымды «KazSat-3R» ғарыштық байланыс жүйесіне ауыстыру қарастырылған. Қаражаттың аз мөлшерде бөлінуі «KazSat-3R» жобасының толық мерзімінде орындалмауына әкеледі. Осыған орай, заңды тұлғаның жарғылық капиталын ұлғайту арқылы республикалық бюджеттен қаржыландыруға мемлекеттік қолдау керек. Бұл салада кадрларды сақтап қалу үшін сирек кездесетін мамандардың халықаралық жобаларға қатысуына, оқуына, білімін арттыруына көмек беруді, қаржылық қолдауды, еңбек жағдайларын жақсартуды талап етеді», деді Ғ.Сарыбаев.
Сенатор Нурия Ниязова «Медеу» мұз айдынының спорттық даңқын қайта жандандыру жөнінде бастама көтерді.
«Медеу» рекордтар аренасы ғана емес, сонымен қатар Қазақстандағы допты хоккейді дамытатын маңызды мекен бола алады және еліміздің осы спорт түріндегі дәреже-деңгейін нығайта түседі. Мұздағы шоу мен мұз спидвейі бойынша әлем чемпионатын ұйымдастыру халықаралық қоғамдастықтың назарын аударумен қатар, еліміздің туризм саласы бойынша тартымдылығын арттыра түседі. «Медеудің» әлемдік спорт аренасына оралуы жаңа рекордтарға жол ашады және әлемдік спорт картасындағы Қазақстанның келбетін айшықтай түседі», деді депутат.
Жанболат Жөргенбаевтың айтуынша, Үкімет Алматы облысындағы Алатау қаласының құрылысына мемлекеттік қолдауды арттыруға және қолға алынған жобаларды іске асыруға 2025 жылға арналған республикалық бюджеттен қаражат бөлуге тиіс.
Сондай-ақ Бибігүл Жексенбай мәслихаттарды цифрландыру сапасына байланысты мәселелерді көтерді. Осыған байланысты сенатор жағдайды жақсартуға, қызметтерді алу үдерісін автоматтандыру арқылы халықтың қажетті ақпаратқа жедел қол жеткізуін қамтамасыз етуге қатысты ұсыныстарын жеткізді. Сенатор «e-Maslikhat» атты бірыңғай цифрлық платформаны әзірлеуді ұсынды. Бұл жүйе құжат айналымын автоматтандыру, депутаттық сауалдарды есепке алу, есептерді жариялау және азаматтармен өзара интерактивті іс-қимыл жасау құралдарын қамтуға тиіс.
