Асқат Бекқалиұлы – мықты график суретші. Оның линогравюра техникасында орындалған шығармаларында туған жер тақырыбы, ұлттық нақышты қазақы болмыс, балалық шақ бейнеленген. Қылқаламынан шыққан композициялар асқан шеберлігімен баурап алады. Қарапайым сызықтар тізіліп келіп қым-қуыт оқиғаға, пластикасы мен көркемдігі керемет қиюласқан ғажайып өнер туындысына айналады.
Шығармалары көпшілік көңілінен шығып, өнертанушылардың оң бағасын алған. Ол республикалық, облыстық, қалалық көрме-байқаулардың лауреаты. Халықаралық, республикалық көрмелерге қатысып келеді. Суретшінің жұмыстары елордадағы Ұлттық музейдің, Ресейдегі «Либеров-центр» мемлекеттік көркемсурет музейінің, Атырау қаласындағы «Ақ Желкен» шығармашылық орталығының, Ақтөбе облысындағы Ш.Берсиев атындағы Ойыл аудандық өнер және өлке тарихы музейінің қорында, Испанияда (Валенсия қаласы), Татарстанда (Қазан), еліміздегі жеке жинақтарда сақтаулы.
Жақында Асқат Батыс Қазақстан облысының мемлекеттік архивінен табылған «Жаскелең-Қоңырша» атты лирикалық-қаһармандық жырына арнап циклды шығармалар салды. Бұл графикалық иллюстрациялар БҚО Халық шығармашылық орталығының 80 жылдық мерейтойы аясында жарыққа шыққан «Жаскелең-Қоңырша» жыры кітабында жарияланды.
– Бұл жырды кітап етіп шығарарда бұрынғы дәстүрге бой ұрғымыз келді. Яғни жырдың көркем эпизодтарын көркем иллюстрациялау ұйғарылды. Ол үшін жас та болса танымал, дарынды суретші Асқат Әбдешевке қолқа салдық. Асқат Бекқалиұлы бұл міндетті абыроймен атқарды. Оның шеберлікпен, шынайы ықыласпен салған графикалық туындылары жырдағы онсыз да шытырман эпизодтарды одан бетер құлпыртып, қосымша рең беріп байытып жіберді. Мұндай қыруар уақыт пен еңбекті талап ететін графикалық суреттерді соңғы рет кеңес кезеңінде шыққан ертегі, эпостардан көрген шығармыз, – дейді осы жинақты құрастырушы Нұрлан Сәдір.
Біз бүгін «Egemen Qazaqstan» газетінің оқырмандарына Асқат Әбдешевтің «Жаскелең-Қоңырша» жырына арнап салған циклды графикалық туындыларын ұсындық.
Батыс Қазақстан облысы
