Оқушы – болашақ маман, жеке тұлға. Мектептегі әр баланың көңілін тауып, қабілетін ашу ұстаздарға зор жауапкершілік жүктейді. Мектебіміздің ашылғанына 90 жыл болды. Осы аралықта білім ордасы қаншама жетістікке қол жеткізді. Соның барлығында мұғалімнің де, тәрбиешінің де еселі еңбегі жатыр. Шәкірт жетістігі – мұғалімнің мерейі. Бүгінде білім ордамыздан түлеп ұшқан шәкірттеріміз жоғары оқу орнына грантқа оқуға түсіп, жақсы нәтижемен тәмамдап, әрбір салада еселі еңбек етіп жүр. Түлектеріміздің жетістігі мектебіміз үшін үлкен абырой, жоғары жетістік. Соңғы жылдары мұғалім мерейін өсіруге бағытталған «Педагог мәртебесі туралы» заң білім саласында еңбек етіп жүрген ұстаздардың жүрегіне жол тапты. «Алты Алаштың басы қосылса, төрдегі орын – мұғалімдікі» деп Мағжан Жұмабаев айтқандай, қазіргі кезде мұғалімдер өз мәртебесіне сай сапалы білім беру үрдісіне белсене араласып жатыр. Білім саласындағы маңызды құжат педагог қызметіне соны серпіліс әкелді. Мұғалім құқығының арнайы заңмен қорғалуы, ұстаздардың қоғам алдындағы еңсесін көтеріп тастады. Қоғамда ұстазға деген айрықша көзқарас қалыптасты. Жүктемесі азайып, білім мен ілімді болашақ ұрпаққа жеткізуші тұлға дәрежесіне көтерілді. Президент тапсырмасына орай бұл бағыттағы жұмыс әлі де жалғасын тауып отыр. Мұғалімнің қоғамдағы рөлі артып, жігеріне жігер қосылды.
Қазір мектебімізде 235 оқушы білім алады. Мұнда негізгі пәндермен қоса осы балаларды өмірге бейімдейтін арнайы пәндер оқытылады. Олардың қатарында мимика, пантомимика, кеңістікті бағдарлау, көру қабілетін түзету, емдік денешынықтыру деген сияқты пәндер бар. Арнайы музыка бөлімі жұмыс істейді. Міне, осы бағытта мектеп ұстаздарына түсетін салмақ та, жауапкершілік жүгі де өте жоғары. Әр оқушының жүрегіне жол тауып, оның қоғаммен ықпалдастығына бар-күш жігерін салып жүрген мектеп ұжымы бүгінде жеке пәндер бойынша, музыка жағынан жетістікке жетіп жүрген оқушыларын мақтан етеді. Мектептегі ұлт-аспаптар оркестрі, домбыра, фортепиано, тағы да басқа бағыттағы сыныптарда оқушылар өз қабілеттерін дамытып жатыр. Осындай ерекше жағдайда еңбек етіп жатқан мектеп мұғалімдері мен жетістікке құлшынған оқушылар мектебіміздің абыройын асырып, әрдайым жеңіс тұғырынан көрініп келеді. Бұл – мемлекет тарапынан ұстаздарды қолдауға бағытталған жобалар жемісі.
Гүлжанар НҰРПЕЙІСОВА,
Қазақстанның Еңбек Ері,
№4 арнайы мектеп-интернаттың математика пәнінің мұғалімі
