ӨСКЕМЕН. 4 ақпан. Шығыс Қазақстан облысының кәсіпкерлер палатасы мен Қытай Халық Республикасы ШҰАР Алтай аймағының Халықаралық сауда палатасы өзара ынтымақтастық жөніндегі меморандумға қол қойды. Бұл жөнінде egemen.kz тілшісі хабарлады.
Шығыс Қазақстанға Қытайдың Алтай аймағынан жұмыс сапарымен арнайы делегация келді. Екі жақты кездесу барысында тараптар өзара ынтымақтастық туралы меморандумға қол қойды. Аталған келісімнің мақсаты – өзара ынтымақтастықты күшейте отырып, іскер серіктес табу, сондай-ақ заңгерлік кеңес қызметін көрсету.
«Шекаралас аймақ ретінде Шығыс Қазақстан үшін қытайлық әріптестермен серіктестікті күшейтудің маңызы зор. Біз инвестицияның құйылуына, жаңа технологиялардың енгізілуіне қызығушылық танытамыз. Екі ел арасындағы тауар айналымы көлемінің көрсеткіші жоғары. Сондықтан серіктестікті күшейтуге көрші ел де күш салады деп ойлаймын», – деді өңірдегі Кәсіпкерлер палатасының төрағасы Игорь Шацкий.
Қытайдан келген өкілдер И.Шацкиймен келісетіндіктерін жеткізді. Осылайша, қос тарап көрмелік іс-шараларды ұйымдастыру және ақпараттандыру бойынша қолдау, мәселе туындататын сауалдар төңірегінде бірлесе жұмыс жасау, сондай-ақ көрмелік-жәрмеңкелік саланы дамыту бойынша келісім жасасты.
Думан Анаш.
Дерек: egemen.kz.
Сурет: Шығыс Қазақстан облысының ақпараттық орталығы.
