- Еркін күрестен әлем чемпионы Ризабек Айтмұхан Рио жазғы Олимпия ойындарының (2016) чемпионы, Токио жазғы Олимпия ойындарының (2021) күміс жүлдегері, америкалық әйгілі балуан Кайл Снайдермен белдесуі мүмкін. Professional Wrestling League ұйымы екі алыптың күресін өткізу жөнінде келіссіз жүргізілгенін хабарлады. 97 кг салмақта жер жүзінің таңдаулы балуаны Снайдердей саңлақты шыңдаған АҚШ-тың еркін күрес ұстаханасы өте тегеурінді. Ризабекке бұл белдесу тәжірибесін шыңдауына серпін берері сөзсіз.
- Біріккен Араб Әмірлігінің Фуджейра қаласында өткен әлем кубогінде семсерлесуші София Ақтаева жеңіске жетті. Жерлесіміз барлық қарсыласын айқын басымдықпен жеңді.
- Бүгін «Шымбұлақ» тау-шаңғы курортында фристайл-акробатика мен фристайл-могулдан жасөспірімдер арасында әлем чемпионаты түңлігін түреді. 11 қаңтарға дейін жалғасатын жаһандық додада ел үмітін Анастасия Городко, Юлия Феклистова, Анастасия Ларионова, Виктория Кузнецова, Юлия Мокина, Семён Русаков, Ильнар Ибрагимов, Данил Коротков, Алексей Дениярёв, Денис Раструба сынды спортшылар арқалайды.
