«Айналымнан алынған темекі өнімдерінің көлемі бұрнағы жылмен салыстырғанда, үш есеге артқан. Мәселен, 2023 жылы 1 358 844 қорап заңсыз темекі өнімі айналымнан шығарылса, былтыр бұл көрсеткіш 4 999 688 қорапқа жетіп отыр. Мемлекеттік кірістер органдарының, шекара қызметінің және экономикалық тергеу департаментінің бірлесе атқарған жұмысы арқылы осындай заңсыздықтың беті ашылды», дейді облыс бойынша мемлекеттік кірістер департаменті басшысының орынбасары Еркін Әли.
Департамент басшысының орынбасары келтірген дерекке жүгінсек, былтыр заңсыз айналымға енген 28145,6 литр алкоголь өнімі тәркіленген. Бұл көрсеткіш өткен жылмен салыстырғанда 7362,2 литрге артқан. Сот шешіміне сәйкес көлеңкелі кәсіппен айналысқан азаматтарға 4,5 млн теңге айыппұл салынған.
Қарапайым халық жылдар бойы түрлі қаржылық пирамидалардың зардабын тартып келгені баршаға белгілі. Алайда заңға шекеден қарайтындар кәсібін тоқтатуға асықпайтын секілді. Заңсыз жұмыс атқарған түрлі ойын-сауық отаулары мен қаржылық пирамидалардың жолын кесу бойынша да өңірде ауыз толтырып айтарлықтай жұмыс атқарылған. Нәтижесінде, заңды белден басу арқылы табыс табуға бейімделген кәсіп иелері тиісті жазасын алып отыр.
«Осы жылы экономикалық тергеп-тексеру департаментінің қолға алуымен қаржы пирамидаларын және заңсыз ойын-сауық орындарын ұйымдастырушыларға қатысты 6 қылмыстық іс тіркелді. Департамент қызметкерлері зардап шеккен азаматтарға келтірілген залалды өтеу және ұйымдастырушылар қолға алған қылмыстық істі анықтау бойынша барлық қажетті шараны қабылдады. Нақтырақ айтар болсақ, былтыр «Chia Tai Tianging Pharmaceutical Group» қаржы пирамидасын ұйымдастырушыларға қатысты сот үкімі шықты. Нәтижесінде, сатып алынған пәтер түріндегі мүлік пен 10 млн теңгеден аса қаражат тәркіленді. Жалпы алғанда, көлеңкелі кәсіппен шұғылданғандарға қатысты жұмыс бір сәтке де тоқтамақ емес. Өйткені заңсыздықтың жолын кесу – басты мақсат. Өткен жылдың 11 айында қаржылық пирамида мен заңсыз ойын-сауық белгілері бар 3 372 сілтеме бұғатталды. Сонымен қатар 720 қатысушысы бар қаржылық пирамидалардың 7 WhatsApp қосымшасындағы топтар жабылған еді», дейді Жамбыл облысы бойынша экономикалық тергеп-тексеру департаменті басшысының орынбасары Самат Қойбақов.
Оның айтуынша, экономикалық тергеп-тексеру департаментінің өңірдегі өкілдігі тарапынан көлеңкелі экономикаға қарсы күрес жұмысы жыл өткен сайын қарқынды жүргізіліп жатыр. Әсіресе акцизделетін өнімдерді заңсыз айналымнан шығару бойынша нақты жұмыстар қолға алынған.
«Департамент қызметкерлері акцизделетін өнімдердің заңсыз айналымымен белсенді түрде күрес жүргізіп жатқанын айтпай кетуге болмас. Әлбетте, қолға алынған жұмыстар өз нәтижесін беріп жатқаны даусыз. Көршілес Қырғыз Республикасына мұнай өнімдерін заңсыз шығаруға қарсы күрес өңірдегі өзекті мәселелердің қатарында екені белгілі. Бұл бағыттағы жұмыстарға барынша байыппен қарап, дер кезінде заңсыздықтың алдын алуға ден қойған жөн. Осы бір өткір мәселені шешу мақсатында, өңірде «Переток» жедел-профилактикалық іс-шарасын өткізуге арналған арнайы алгоритм әзірленген. Құзырлы органдардың қолға алған жұмысының нәтижесінде, мұнай өнімдерінің заңсыз шығарылуы 65 пайызға азайды. Бұл өз кезегінде жанармайдың ішкі нарықтағы жетіспеушілігін азайтуға зор ықпал ететіні анық. Осы жылдың 11 айында жалпы құны 5 млрд теңгеден асатын темекі өнімдерінің заңсыз айналымына қатысты 22 қылмыстық іс тіркелді. 6,8 млн қораптан аса темекі заңсыз айналымнан шығарылды», дейді С.Қойбақов.
Ал облыс бойынша мемлекеттік кірістер департаменті басшысының орынбасары Еркін Әлидің айтуынша, мұнай өнімдері бойынша заңсыз айналым 132,4 тоннаны құраған. Сот шешімдеріне сәйкес 4,2 млн теңге көлемінде айыппұл салынып, оның 3,7 млн теңгесі өндірілген.
Өңірде пәтерді жалға беру қызметімен айналысатындардың жұмысын жүйелеуге де басымдық беріліп отыр. Бұл өз кезегінде жергілікті қазынаға салықтық төлемдер түсіретіні анық. Е.Әли келтірген дерекке сенсек, мүлікті жалға берумен айналысатын кәсіпкердің саны 2 971-ге жеткен. Ал осы жылы жүргізілген түсіндіру жұмысының нәтижесінде, 586 азамат жеке кәсіпкер ретінде тіркелген.
Жамбыл облысы
