А.Городко Суперфиналдық тартыста америкалық қарсыласы Риз Чапделайнды шаң қаптырды. Мұның алдында фристайл-могулдан жекелей сайыста күміс медаль да иеленген еді. Саңлақ спортшымыз 2022 жылы, былтыр да әлем чемпионы атанған болатын.
7 қаңтарда басталған әлем чемпионаты ертең мәресіне жетеді. Еліміздің саңлақтары Германия, Канада, Қытай, Франция, Швейцария, АҚШ, Оңтүстік Корея, Жапония сынды қысқы спорт түрлері қарқынды дамыған елдердің спортшыларымен тартысқа түсті. Жалпы саны 110 спортшы бақ сынаған әлем чемпионатында параллель-могулдан Анастасия Городко, Юлия Феклистова, Анастасия Ларионова, Виктория Кузнецова, Юлия Мокина, Семён Русаков, Ильнар Ибрагимов, Данил Коротков, Алексей Дениярёв, Денис Раструба сынға түсті. Ал шаңғы акробатикасынан Дінмұхаммед Райымқұл, Ардана Маханова, Райана Маханова, Асан Асылхан, Роман Погосян, Ұланбәкір Өмірзақов, Аделина Өмірзақова ел үмітін арқалады.
Жасөспірімдер арасында фристайлдан әлем чемпионаты 1986 жылдан бері Халықаралық шаңғы федерациясының (FIS) қолдауымен тұрақты ұйымдастырылып келеді. Елімізде жасөспірімдер арасындағы әлемдік аламан тұңғыш рет өткізілді.
Құраманың аға бапкері Дмитрий Рейхерд 1 алтын, 1 күміс медаль олжалаған Анастасия Городконың еңбегін жоғары бағалады. «Біз «Шымбұлақ» тау шаңғы курортында әзірлік өткіздік. Анастасияның ерен жеңісі бапкерлер ұжымының ортақ табысы», деген жаттықтырушы шәкірттері бұдан кейін де байрақты додаларда олжа салатынына сенім артатынын жеткізді.
Кеше Денис Раструба мен Юлия Фиклистова жұптық фристайл-могулдан әлем чемпионатының күміс жүлдесін олжалады. Жұптық тартыста Қазақстан-2 командасы (Денис Раструба, Юлия Фиклистова) финалға жетіп, 28 ұпай жинады. Әлем чемпионатының алтын медалін АҚШ-2 құрамасы иеленсе, қола медальды тағы бір америкалық жұп еншіледі.
