Алматы қаласы әкімдігі және қалалық музейлер бірлестігінің қолдауымен шыққан энциклопедияның көлемі – 47 баспа табақ, таралымы – 1000 дана. Алғысөзін Қазақстан Жазушылар одағының басқарма төрағасы Мереке Құлкенов, Алматы қаласы музейлер бірлестігінің директоры Ләззат Сағындықова және Ә.Қайырбеков жазған. Бұл еңбекте қазақ әдебиетінің классигі, Қазақстанның халық жазушысы, драматург, Социалистік Еңбек Ері, академик, сөз зергері Ғ.Мүсіреповтің өмір жолы, өскен ортасы, шығармаларының жазылу тарихы, әдеби байланыстары, ой-тұжырымдары, замандастарының лебізі молынан қамтылған. Энциклопедияны дайындауға Қазақстан Республикасы Мәдениет қайраткері Г.Құдабаева, Музей кешенінің ғылыми қызметкерлері Н.Алтаева, Р.Отар, А.Көшербаева, Ж.Таева қатысты. Редакторы – Алматы қаласы музейлер бірлестігі директорының ғылыми жұмыстар жөніндегі орынбасары Р.Қайратұлы.
Іс-шараның модераторы Ә.Қайырбеков энциклопедияның қалай әзірленгені туралы қысқаша ақпарат берді. Қазақстан Республикасы Президентінің кеңесшісі М.Отарбаев, Алматы қаласы әкімінің кеңесшісі М.Ахетов, Қазақстан Жазушылар одағының басқарма төрағасы М.Құлкенов, Қазақстанның Еңбек Ері А.Әшімов, Мемлекеттік сыйлықтың лауреаты Н.Оразалин, т.б. кітап тұсаукесерінің рәсімін жасады. Кітаптың 5 данасы Ұлттық кітапхана қорына тапсырылды. Көпшілік қауымға классиктің көзі тірісінде түскен деректі фильмдерден арнайы дайындалған шағын бейнежазба көрсетілді.
Кітап таныстырылымына Ғабеңнің қызы Гаухар Мүсірепова, жазушының жиені Сәуле, немере қарындасы Жанат, т.б. қатысты. Әнші, Қазақстанның еңбек сіңірген қайраткері Е.Шүкіман кезінде Ғабеңнің сүйіп тыңдаған әндері Ақан серінің «Маңмаңгері» мен Біржан салдың «Алқаракөк» әндерін орындады. Кеш соңында қонақтарға энциклопедияның бір-бір данасы сыйға берілді.
Назгүл АЛТАЕВА,
С.Мұқанов пен Ғ.Мүсіреповтің әдеби-мемориалдық музей кешенінің ғылыми қызметкері
