Сурет: stan.kz
Мұхтар Мағауин – қазақ әдебиетінің айбынды тұлғасы, ұлттық әдебиетіміздің асыл қазыналарын зерттеп, оның бай мұрасын әлемдік мәдениетке танытқан жазушы. Оның қаламынан туған «Тазының өлімі», «Бір атаның балалары», «Көкбалақ», «Жүйріктің тағдыры», «Шақан-Шері», «Көк мұнар», «Қобыз әуендері», «Аласапыран» секілді шығармалары қазақ әдебиетінің алтын қорына енді. Шығармалары тек қазақ әдебиетінің деңгейін арттырып қана қоймай, бүкіл түркі дүниесі рухани болмысын жаңа биіктерге көтерді.
Мұхтар Мағауин ұлт әдебиеті тарихын терең зерттеп, қазақ хандығы тұсындағы жыраулар мұрасын әлемдік руханият деңгейіне көтерді. Мәселен, «Қазақ тарихының әліппесі» — ұлт тарихына арналған маңызды еңбектерінің бірі. Бұл кітапта автор туған халқымыздың дербес ұлттық мемлекетi – арыдағы Ғұн ұлысы, Түрiк қағандығы, берiдегi Алтын Ордадан бастау алатын Қазақ ордасының терең тарихын қамтиды. Сондай-ақ оның көркем аударма саласындағы еңбегі де ерекше бағаланады. Уильям Сомерсет Моэмнің шығармаларын қазақ тіліне аударып, әлем әдебиетінің үздік туындыларын қазақ оқырмандарына жеткізу жолында да елеулі еңбек сіңірді.
Мұхтар Мағауин өз халқының әдебиетін әлемдік аренаға танытып, ұлт руханиятының іргетасын нығайтқан жазушы ретінде ел есінде, тарихта мәңгі қалады.
Ауыр қайғыға ортақтасып, отбасына, туған-туыстарына және исі қазақ жұртына көңіл айтамын. Марқұмның жаны жәннатта болсын!
Мереке Құлкенов,
Жазушылар одағы басқармасының төрағасы
